Сырт адамға «тоғыз жолдың торабында» орналасқан өңірденбіз деп Шу өлкесінің мақтауын келістіріп-ақ жатамыз. Сол теміржол біздің ауылдың маңына да сүрілген. «Теміржолдың бойында болсаң, аштан өлмейсің» деген бір кездері айтылған нақыл сөз әлі де маңыздылығын жоғалтқан емес. Бірлік ауылы дамуының бастауы Түрксіб теміржолы, Шу-Мойынты теміржолы құрылыстарының қарқын алуымен байланысты.
Бала күнімізде көнекөз қариялардан естігеніміз еміс-еміс есімде қалып қойыпты. 1903-1905 жылдары Шалдауар деген жерде қоныстанған өзге ұлт өкілдері көктем шыға малдарын Шу өзенінің бойы- на бағады екен. «Өзен жағалағанның өзегі талмас» деп, жері шұрайлы болғандықтан 10-15 үйлі неміс, орыс ұлтынан құрылған кішігірім ауыл қазіргі Бірлік ауылының орнына қоныстанған деседі. Олар Шу өзенінен тоған тартып, бидай, тары егіп, тіршілік ете бастайды.
1917 жылы Шу өзенінің оң жақ жағалауын мекендеген елдің ішінде қазіргі Бірлік елді мекені құрылып, жаңа өкіметтің ұйғарымы бойынша Пішпек уезі Жетісу губерниясына қарайды. Бірлік станциясының орналасқан жері аудан орталығы Новотройцкіге, Шу станциясына, Көктөбе ауылына және Төртіншіге
жақын орналасқандықтан сол ауылдың жігіттері теміржол құрылысына атсалысты. Бұл құрылысқа қатысу үшін Бірлік ауылына Арқадан арнайы келген жігіттердің де легі көп болып, олар да біржолата орнығып қалады. Түрксіб құрылысына ауыл тұрғындарынан Исабеков Зейнеғабден («Қызыл Ту», «Ленин» ордендерімен марапатталған), Кожина Клавдия, Кислова Прасковья, Баштовая Мариялар қатысты.
1948 жылы Шуда аймақтық тұқым базасының құрылуына байланысты аймақтық бидай дайындау және тұқым тарату базасы құрылды. Шу астық тарау базасының ұлғаюына және егін егетін жердің көбеюіне байланысты Бірлік бидай сақтау бөлімшесі қанат жайып, кейінірек өзінше мекеме болып бөлініп шықты. Менің білетінім, астық қабылдау пунктінде талай азаматтар тер төкті. Тәуелсіздік алған жылдарға дейін элеваторда Байжан Шынболатов деген азамат қызмет жасап келді. Ол кісімен талай дидарласқан сәттеріміз де болды. Осынау өнегелі өткені, өрелі істері бар Бірліктің еңбекпен біте қайнасқан берекелі ауыл болғаны, сол ізгі істердің жібін үзбеуге барын салып жатқан халқы бары қуантады.
Халқымызда «Бірлігі жақсының тірлігі тапшы болмайды» деген өнегелі сөз бар. Сондықтан да ауылдықтардың ынтымағы жарасып, бірлігі баянды болса деген ниетіміз алға жетелесе дейміз. Тірлікте
тапқан татулықты тұрақты етуге ауыл тұрғындары атсалысса, жетістіктеріміз молынан болмақ!
Төлеухан ҚАРАМОЛДАЕВ,
Бірлік ауылдық округінің
ақсақалдар алқасының төрағасы.
