Желі қолданушылары аккаунт иесіне көңіл айтып, сабырға шақырды. «Той күні белгіленген екен. Шымкентке қызды алып кетуге келгендегі жағдай», «Шымкенттен қалыңдық әкеле жатқанда полицейлер ұстап алған. Сосын машина ұрлаған деп мойындату үшін ұрған», «Қостанайдан Шымкентке қыз алып қашуға барған. Полицейлер оны ұрлықшы деп ұрған кезде ұйқы безі жарылып кеткен» деп жазды қолданушылары.

Экспресс К тілшісі видеодағы бойжеткеннің есімімен ашылған Instagram аккаунтын тауып, хабарласты. Алайда бойжеткен «Айтарым жоқ» деп сұхбат беруден бас тартты.

Марқұм Нұрболат Жұмабаевтың әкесінің адвокаты Талғат Есімов Экспресс К тілшісіне берген сұхбатында қайтыс болған жігіттің кездесіп жүрген қызының есімі Меруерт екенін растады. Және ол бойжеткенге тергеу кезінде куәгер болуға көндіргенін айтты.

«Тергеушілер марқұмның кездесіп жүрген қызы болғанына көздері жету үшін мен Меруертті тергеуге келіп, жауап беруін сұрадым. Ол қатты қорқып қалған. Тергеу мекемесіне өзім алып бардым. Өзгелер үшін, соның ішінде журналистерге де қазір жауап бермейді. Өзінің қауіпсіздігі үшін керек. Бойжеткен мазаламағанын қалайды», — деді Талғат Есімов.

Еске салсақ, 8 желтоқсанда Шымкенттегі Полиция департаментінде 31 жастағы Нұрболат Жұмабаев көз жұмды. Экспресс К тергеу кезінде көз жұмған қостанайлық жігіт туралы бұған дейін жазды.

Көз жұмған жігіттің туыстары Нұрболат Жұмабаев Шымкентке болашақ жарын алып кету үшін келгенін айтты. 17 желтоқсанда келіннің беташар рәсімін өткізуді жоспарлаған.

Оқиға болған күннің ертеңіне қайтыс болған жігіттің әкесі ұлын полицейлер ұрып өлтіргеніне сенімді екенін айтты. Ал Полиция департаментінің бастығы журналистерге марқұм тергеу кезінде өзін жайсыз сезініп, кенеттен қайтыс болды деп мәлімдеді.

Мәйітті экспертизаға алып кірмей тұрып полицейлер көз жұмған жігіттің әкесіне ақша ұсынғаны белгілі болды.

Оқиға күні Нұрболат Жұмабаевтың қасында досы Сергей Петров та болған. Ол полицейлер ұрып-соғып, жасамаған қылмысты мойындатқысы келгенін айтты.

Медициналық сараптама қорытындысы бойынша 31 жастағы Нұрболат Жұмабаевтың неден өлгені белгілі болды.

Бұл оқиға бойынша Қылмыстық кодекстің 106-бабы 3-бөлігіне сәйкес (Денсаулыққа қасақана ауыр зиян келтіру, өлімге әкеп соғу) қылмыстық іс қозғалды. Алты полицей ішкі істер органдарынан шығарылды.

Тергеу сотының санкциясымен үш лауазымды полицей (екі подполковник, бір полковник) екі айға қамауға алынды. Көз жұмған жігіттің әкесінің адвокаты Талғат Есімов жігіттің өліміне қатысы бар өзге де қызметкерлер жауапқа тартылу керектігін айтып, бұл бойынша прокуратураға талап-арыз жазатынын жеткізді. Сондай-ақ адвокат қоғамдық резонанс тудырған оқиғадан соң Полиция департаментінің бастығы отставкаға кетуі керек екенін айтты.

Марқұмның денесі 11 желтоқсан күні Қостанай облысында жер қойнына тапсырылды.

Дәл осы күні Шымкенттің бас полицейі қайтыс болған жігітке полицейлер тарапынан күш қолданылғанын мойындады