Қазақстан халқы тілдері күніне орай, өңірдегі тіл жанашырлары облыс әкімінің арнайы жүлдесімен марапатталды.Облыс әкімінің жүлдесін мемлекеттік тілге шынайы жанашырлық танытып, тіліміздің дамуына нақты ісімен үлес қосып жүрген тіл жанашырлары иеленді. Жүлде 6 номинация бойынша табыс етілді.
«Тіл майталманы» номинациясының иегері – «Тараз 24» телеарнасының директоры, Тараз қалалық мәслихатының депутаты Қуатова Зарина Пердібекқызы, «Тіл тірегі» номинациясының иегері – «Дүнген этномәдени орталығы» заңды тұлғалардың республикалық қоғамдық бірлестігі» Аналар кеңесінің төрайымы Даузова Кулсара Манкизовна, «Тіл сақшысы» номинациясының иегері – белсенді жас Аяз Назерке Досымханқызы, «Тіл мерейі» номинациясының иегері –Жамбыл облысы ТЖД «Өрт сөндіру және авариялық-құтқару жұмыстары қызметі» мемлекеттік мекемесінің аға байланыс шебері, азаматтық қорғау аға сержанты Карташова Карина Сергеевна, «Тіл — қазына» номинациясының иегері – М.Х.Дулати атындағы Тараз өңірлік университетінің профессоры, педагогика ғылымдарының кандидаты Керімбаева Рысты Қалдыханқызы, «Тіл шебері» номинациясының иегері – Тараз қаласы №18 орта мектептің мұғалімі, дизайнер, республикалық, облыстық «Абай оқулары» байқауларының жүлдегері Устинова Марина Геннадьевна марапатталды.
Сондай-ақ, Достық үйінде Қазақстан халқы тілдері күніне орай, «Тіл – татулық тірегі» атты облыстық форум өтті.
Өңірде тіл саясатын насихаттау, оның қоланыс аясын кеңейту бағытында ұйымдастырылған форумға тіл жанашырлары мен мемлекеттік тілді жетік меңгерегн этнос өкілдері, түрлі сала қызметкерлері қатысты.
Мемлекеттік тілді жетік меңгеру арқылы көптеген жестістіктерге қол жеткізген Тараз қаласы әкімдігі білім бөлімі, №26 орта мектебінің директоры, украин ұлтының өкілі Леоненко Тарас, Жамбыл облысы полиция департаментінің аға инспекторы, өзбек ұлтының өкілі Кинжеханова Диляфруз, «ЦентрКредитБанкі» акционерлік қоғамының менеджері, ҚР спорт шебері, кәріс ұлтының өкілі Хан Виктория қазақ тілін тез меңгерудегі өз тәжірибелерімен бөлісті.
Ал, Байзақ ауданы білім бөлімінің Ғани Мұратбаев атындағы мектеп гимназияның биология пәнінің мұғалімі, орыс ұлтының өкілі Кравчук Евгений, Тараз қаласы әкімдігінің білім бөлімінің №34 орта мектебінің математика пәні мұғалімі, дүнген ұлтының өкілі Айдарова Хабиба, Тараз қаласы білім бөлімінің №7 мектеп-гимназиясының орыс тілі мен әдебиеті пәнінің мұғалімі Маслова Кристина және №18 орта мектебінің көркем еңбек пәнінің мұғалімі, дизайнер орыс ұлтының өкілі Устинова Мариналар өз пәндерінен орыс сыныптарында қазақ тілінде сабақ беретіндіктерін мақтанышпен жеткізді.
Форумда тіл саясатын дамытуға үлес қосып жүрген тіл жанашырларына Қазақстан Республикасы Ғылым және жоғары білім министрінің, Тіл саясаты комитеті төрағасының және басқарма басшысының Алғысхаттары табыс етілді.
Дедек Төлен
