Біздің елімізде жыл сайын 19 қазан — Қазақстан Республикасының құтқарушылар күні ретінде атап өтіліп келеді. 26 жыл бұрын ҚР Тұңғыш Президенті Нұрсұлтан Назарбаевтың Жарлығымен төтенше жағдайлар жөніндегі мемлекеттік комитеті құрылған еді. Сол сәттен бастап өрт сөндірушілер, сүңгуірлер және азаматтық қорғаныс қызметкерлері осы күнді кәсіби мереке ретінде 26-шы рет қарсы алуда. Бұл жандар әрбір күні өз бастарын қатерге тігіп, адам құтқаруды асыл парызы санап, мінсіз қызмет көрсетіп жүр.
Осыған орай біз Шу аудандық төтенше жағдайлар бөліміне бас сұғып, бөлім бастығы азаматтық қорғау подполковнигі Тимур Кариевпен, бөлімше командирі старшина Ғани Керімбаймен сұхбаттасқан болатынбыз.
-Менің өртке қарсы қызметте жүргеніме 15 жыл толды. Осы уақыт ішінде көптеген оқиғаларды бастан өткердім. Әрбір өрт сөндіруге басшылық ететін адам өрт орын алған жағдайда 5 басты қағиданы білуі тиіс. Бұл қағидаларды білгеннен бөлек, төтенше жағдай кезінде күтпеген оқиғалар туындауын ескерсек әрдайым жедел әрі дұрыс шешім қабылдау қажет. Өрт сөндірушілердің басты міндеті — адам өмірін құтқару,-деді Ғани Орынханұлы.
-Есімде қалған сәттің бірі осыдан 5 жыл бұрын қыс мезгілінде болған. Таңғы 5-6 шамалары болуы керек. Шу қаласындағы Қонаев көшесіндегі көппәтерлі тұрғын үйден өрт шыққан туралы хабарлама келіп түсті. Біз дереу жиналып, оқиға орнына бардық. Байқасақ бірінші қабаттағы пәтерден жалын шығып жатты. Өздеріңіз білетіндей қазіргі заманғы жөндеу жұмыстары тез ерігіш пластмассалардан тұрады. Бөлменің төбесі пластикалық тақтайша, түсқағаз, линолеум және басқа да дүниелер үйімізде бар екені белгілі. Оның өртінен бұрын түтіні зиянды. Оның ашты иісінен гемоглабин жолдары бітеліп, ағзамызға улы зат тарап, улануға апарып соғады. Подъездге кіре сала қою түтінге тап болдық. Әріптесім ахуалды бағалап, маған адам құтқаруды тапсырып, өзі өртті ауыздықтауға кірісті. Мен еркін тыныстауға мүмкіндік беретін арнайы киімді киіп, есіктерді қағып, адамдарды оята бастадым. Бір пәтердің жанынан өтіп бара жатып балалардың жылаған дауысын естіп қалдым. Сөйтсем ол үйде 3 бүлдіршін бар екен. Сол кезде жедел әрекет жасап, соларды құтқарып алдым. Бағымызға орай, тұрғындар дін аман қалып, жалын сөндірілген болатын,-деген естелігімен бөлісті бөлімше командирі Ғани Керімбай.
-Ұмытылмайтын келесі оқиға — 2013 жылы «Шәймерден» жанар-жағармай құю бекеті жанында болған еді. Біз шақыруға бара жатып орталық қазандық жанындағы үлкен көпірден-ақ алып жалынды аңғардық. Оқиға орнына келгенде жүк көлігінің жанып жатқанын көрдік. Басты мәселеміз оның жанар-жағармай жиналған цистерна қасында тұрғандығы болды. Сумен өшіру әрекетіміз нәтижесіз болды. Көбік те көмектеспеді. Жағдайға байланысты өртеніп жатқан көлікті бекеттен алыстату керектігін ұғындық. Бекет иесінен жақын маңайда жүк көлігі бар ма деп сұрағанда, ол сол маңдағы ГАЗ-53 жүк көлігін көрсетті. Дегенмен бұл көлік өртенген көлікті сүйреуге қауқарсыз болды. Оның үстіне полиция қызметкерлері жолды бөгеп тастаған болатын. Жол бойында тоқтап тұрған КамАЗ көлігіне жүгіріп барып жағдайды түсіндірдім. Тіпті рөлге өзім отыруға талпындым. Өйткені өзгелер жапа шекпеуі тиіс. Алайда, КамАЗ иесі өзі жүргізетінін айтып, толықтай өртенген көліктің жанына бардық. Темір арқан тауып сүйреуге талпындық. Бір үзілген соң, монтировкамен бекітіп қайта тарттық. Құдайға шүкір, бәрі оңынан болып, өрт толығымен сөндірлді,-дейді Ғани Орынханұлы өткенді есіне алып.
Сұхбат барысында аталған бөлім жұмысы өрт сөндірумен шектелмейтінін білдік. Мұнан бөлек, бөлім қызметкерлері су тасқыны кезінде, жер сілкінгенде, сел жүргенде көптеген оқиғаларда құтқару жұмысын жүргізеді. Олар одан басқа түрлі шақыруларға барып, арасында құлыптанып қалған балаларды құтқарып, үй жануарларының талға шығып түсе алмай қалғанында көмекке барып жатады.
-Халықтың өсуімен бірге өрт саны да өршіп барады. Өткен жылмен салыстырғанның өзінде биыл көріксіз көрсеткіш 25 пайызға өскен. Өрттің басым көпшілігі азаматтардың жауапсыздығынан және абайсыздығынан болып жатады. Оның себептері тоқ желісін ақауларын жөндемеу, пештерді қараусыз қалдыру, балаларды бақыламаудан болады. Сондықтан біз тұрақты түрде тұрғындарға түсіндіру жұмыстарын жүргізіп, сақ болуға шақырып жатамыз,–дейді Тимур Кариев.
Бөлім қызметкерлерінің белгіленген жұмыс тәртібі бар екенін айта кеткен жөн. Жұмыс тәртібі тәжірибелік сабақтар оқу, өртке қарсы қауіпсіздік шаралары жөніндегі дәрістерді тыңдау, нормативтерді тапсыру және өзге де тапсырмаларды орындаудан тұрады.
Тимур Кариев және Ғани Керімбай сұхбаттың сәтін пайдалана отырып, елдегі барша әріптестерін кәсіби мерекелерімен құттықтап, зор денсаулық, отбасына амандық, маңызды қызметтеріне толағай табыс тілейтінін жеткізді.
Біз де өз кезегімізде шулық құтқарушыларды мерекелерімен құттықтай отырып, еңбектеріне табыс тілейміз. Адам құтқаруды айнымас міндеті санайтындардың жігерлі жұмыстарына алғыс білдіреміз.
