Бүгін аудан әкімдігінің мәжіліс залында аудан әкімі Сәкен Мамытов су шаруашылығы қызметкерлерін қабылдады.![]()
Жиын барысында аудан басшысы құттықтау сөз сөйлеп, су шаруашылығы қызметкерлері жұмыстарының маңыздылығына тоқталды: — Су — тіршіліктің қайнар көзі, бұлағы. Табиғи суды реттеп, оны тиісті орындарға жеткізетін арнайы мамандардың жұмысы көзге көрінбегенімен су жүйесін іске асыруда еңбектері ерен.
Ауданымызда «Жаңатас Су-Жылу» кәсіпорны қала тұрғындардың суға уақытылы қол жеткізуі үшін тынбай еңбек етуде. Мекемеде қазандық қайта жаңғырып, Германияның «BOSCH» компаниясы арқылы арнайы құрылғылар орнатылды. Аталмыш құрылғыда 4 су қазандығы 1 бу қазандығы жұмыс жасап тұр. Жаңа қондырғының артықшылығы ұзақ уақытқа дейін жарамдылығында және заманауи технологиялық құрылғылармен жасақталған.
Сонымен қатар, «Сарысу сулары» коммуналдық мемлекеттік кәсіпорыны ауылдық жерде тұратын халықты және мекемелерді таза ауыз сумен қамтамасыз етуде еселі еңбек етіп келеді, — деді. Сонымен қатар, аудандық мәслихат төрағасы Шаттық Мұсабеков, аудандық алқабилер кеңесінің төрағасы Қалмырза Жандарбек және қалалық ардагерлер кеңесінің төрағасы Жұмәлі Орымбаев та ізгі тілектерін білдіріп, сала мамандарына толағай табыс тіледі.
Ауданның су ресурстарын пайдалануды жүзеге асыруда қосқан зор үлес қосып жүрген бірқатар сала мамандары аудан әкімінің және аудандық мәслихат төрағасының Құрмет грамотасы және Алғыс хаттарымен марапатталды. Өз кезегінде сала ардагерлері еселі еңбекті бағалап, ескергені үшін аудан басшылығына ризашылықтарын білдірді.