Фото: Ақорда баспасөз қызметі
Мемлекет басшысы Қасым-Жомарт Тоқаев билік тармақтарының басшыларын және үкімет мүшелерін мемлекеттік наградалармен марапаттады. Марапатталғандар қатарында елдің әлеуметтік-экономикалық саласы мен ішкі саясатқа жауапты тұлғалар бар.
Мұны Ақорда баспасөз қызметі хабарлады.
“Президент елдің әлеуметтік-экономикалық дамуына, заңдылық пен тәртіпті нығайтуға қосқан елеулі үлесі үшін бірқатар азаматқа мемлекеттік награда табыстады”, – делінген хабарламада.
Кімдер марапатталды
Елдің дамуына және құқықтық тәртіпті нығайтуға қосқан үлесі үшін марапатталғандар:
Олжас Бектенов – Қазақстанның премьер-министрі;
Ерлан Қошанов – Мәжіліс төрағасы;
Мәулен Әшімбаев – Сенат төрағасы;
Ерлан Карин – Мемлекеттік кеңесші;
Аида Балаева – премьер-министрдің орынбасары, мәдениет министрі;
Нұрлан Әбдіров – Орталық сайлау комиссиясының төрағасы.
Фото: Ақорда баспасөз қызметі
Сонымен қатар негізгі қадағалау және құқық қорғау органдарының басшылары, депутаттық корпустың өкілдері де марапатталды.
Марапатталғандар қатарында:
Берік Асылов – Қазақстанның бас прокуроры;
Ержан Сәденов – ішкі істер министрі.
Фото: Ақорда баспасөз қызметі
Парламент өкілдерінің ішінде президенттің қолынан мемлекеттік награданы Мәжіліс депутаттары Айдос Сарым мен Ринат Зайытов та алды.
Фото: Ақорда баспасөз қызметі
Айта кетейік, бұған дейін Мемлекет басшысы Қасым-Жомарт Тоқаев Конституцияға қол қойғаннан кейін парламент сайлауын жаңа сессияның ашылуына дейін өткізу жоспарланып отырғанын мәлімдеген еді.
