Бейнеден кадр
Әлеуметтік желіде екі полицейдің түсініксіз әрекетінің видеосы талқыланып жатыр. Олардың Түркістан облысы, Созақ ауданының тәртіп сақшылары екені айтылады.
Желі қолданушылары полицейлер ішімдік ішіп алған болуы мүмкін деген болжамын айтқан. Түркістан облыстық Полиция департаменті бұл оқиғаға қатысты түсініктеме берді, деп хабарлайды Шаңырақ инфо Экспресс К. сайтына сілтеме жасап…
Видео АСКО АСКО Youtube-арнасына жүктелді. Онда екі тәртіп сақшысы мен тұрғындар арасындағы жанжалды көруге болады. Бейнежазба жеке үйде түсірілген.
Полицейлердің айтуынша, олар құқық бұзған азаматтың артынан қуып келген. Сөздеріне сенсек, көліктің сақтандыру полисі болмаған. Сол үшін оны полиция бөлімшесіне алып кетуге келіпті. Егде жастағы әйел мен ер кісі басына азаматтық қалпақ пен үстіне форма киген полицейден «Ішіп алғансың ба?» деп сұрайды. Осы сәтте тәртіп сақшылары егде жастағы адамдардың артында тұрған жүргізушіні жұлқылап, алып кетпек болады.
«Менің есігімнің алдына келетіндей не болды?» деген үй иесіне полицейлердің бірі «Еріккеннен кеп отырмыз ба? Ереже бұзды. Болды ма, жете ме?» деп дөрекі жауап береді. Бірақ нақты қандай ереже бұзғанын түсіндірмейді. Онымен қоймай дәл осы полицей жүргізушіге «Бүгін ғана көшеде жүрмейсің ғой. Шықсай, неге мамаңның артына тығылып тұрсың?» дейді. Оқиғаның немен аяқталғаны белгісіз. Алайда Youtube-арнадағы мәліметте тәртіп сақшылары видеоны өшір деп азаматты полиция бөлімшесіне жеткізіп, қамап қойғаны жазылған. Оқиға Созақ ауданының орталығында қаңтардың 1-і күні түнгі уақытта болған екен.
Түркістан облыстық Полиция департаментіндегілер бұл оқиғаға қатысты түсініктеме берді. Олардың мәліметінше, тәртіп сақшылары жарықшамы жанбаған «Ауди 100» көлігін тоқтатқан. Сол кезде көліктің сақтандыру полисі жоқ екені анықталыпты. Хаттама түзу кезінде жүргізуші қашып, жақын маңдағы үйге кіріп кеткен.
«Тәртіп сақшылары тарапынан толық мән-жай айтылып, қызмет барысы түсіндірілген. Осыдан соң Әкімшілік құқықбұзушылық туралы кодекстің 230-бабымен (Қазақстан Республикасының мiндеттi сақтандыру туралы заңнамасын бұзу) хаттама толтырылып, тарқасқан. Полицейлер оны ұстап әкетпеген», — дейді Полиция департаментіндегілер.
Экспресс К тілшісі полицейлердің әрекеті қаншалықты заңды екенін адвокат Талғат Есімовтен сұрап білді. Авдокат полицейдің сақтандыру полисі үшін әкетеміз дегені заңға қайшы деп отыр.
«Оқиғаның нақты қалай болғанын білмегендіктен, мына заң бұзылған деп айту қиын. Дегенмен видеода полицейлер жеке үйге келіп тұр. Олардың біреуінің киімі талапқа сай емес. Басына азаматтық қалпақ киіп алған және өзін ұстауы да күдік тудырады. Ішіп алған болуы да мүмкін. Екеуінен де дөрекілік байқалады. Яғни, ішкі істер органы қызметкеріне тән емес қылық танытып тұр. «Шықсай, неге мамаңның артына тығылып тұрсың?» дегені қоқаң-лоққы жасаумен пара-пар. Яғни, қызметін асыра пайдалану деуге де келеді. Меніңше, олардың әрекетін тәртіптік комиссия қарауы керек. Ал тұрғындар өзіндік қауіпсіздік қызметіне шағым түсіруге толықтай құқылы», — дейді Талғат Есімов.
Полиция департаментіндегілер видеодағы тәртіп сақшыларына қатысты қызметтік тексеру жүргізіліп жатқанын айтты.
