Соңғы апталарда толассыз жауған нөсер жауыннан Тараздың біраз жолдары мен аумақтарында су жиналып, тұрғындарға ыңғайсыздық туғызғаны анық. Әсіресе, Шалғай Қарасу, Тайвань елдімекендерінде жерасты суы да көтеріліп, кейбір тұрғы үйлердің аулаларын су басты. Аталған жағдай жергілікті биліктің толық бақылауында. Қаладағы коммуналды-шаруашылық мекемелері күшейтілген режимде жұмыс істеуде.
Авариялық-құтқару қызметі мен жедел желі тәулік бойы қосылған.
Алдымен көше бойындағы, содан кейін жеке тұрғын үйлердің аулаларындағы сулар сорғытылуда. Тараз қаласының әкімі Ержан Жылқыбаев дренаж каналдары жоқ аумақтарға уақытша жасанды арық қазу жұмыстарын жүргізіп, үйлерге су кетудің алдын алуды тапсырды. Мұндай жұмыстар Шалғай Қарасу аумағында жасалуда.
Айта кетейік, шаһардың ирригация жүйелерін қалпына келтіру жұмыстары кезең-кезеңімен іске асырылуда.
Өңірлік 3 жылдық жоспарға сәйкес 2024 жылға дейін бұл жұмыстар ретке келтірілуі тиіс. Биыл ирригация жүйелерін тазарту жұмыстарына 200,0 млн теңге қарастырылды. Оған “Қапал”, “Төрегелді”, “Қарасу 1”, “Қарасу 2”, “Ұшбұлақ” және “Сеңкібай” каналдарын тазарту жұмыстары жүргізіледі. Су ағарларды қалпына келтіру мәселесі рет-ретімен қалпына келтіру — басты назарда.
Қазіргі кезеңде қала аумағындағы 63 көшеде техника мен қатар адам күші тартылған. Бүгінгі жұмыстарға бірнеше жауапты мамандар және тұрғындар да жұмылдырылды. Сондай-ақ мерекелік демалысқа қарамастан 109 жедел желісі үздіксіз жұмыс істеп тұр.
