Тәуелсіздігіміздің 30 жылдығы қарсаңында аудандық мәдениет үйінде «Туған жерім — дархан далам!» атты ауылдық округтердің аудандағы күндері бастау алды. Ажарлы, айшықты істерімен, тыныс-тіршілігімен таныстыруға бет бұрған ауылдардың алғашқысы болып Далайқайнар ауылы мен Шоқпар ауылдық округтері ауыл күндерінің шымылдығын ашты. Оған аудандық мәслихат хатшысы Жасұлан Әбенов, аудан әкімінің орынбасары Ербол Аймамбетов, аудан әкімдігінің мәдениет және тілдерді дамыту бөлімінің басшысы Әсел Жазықбаева, ауылдық округ әкімдері және арнайы қонақтар қатысты.
Далақайнарлықтар ә дегеннен дархан пейілімен қонақтарды тәнті етті. Қазақтың ұлттық тағамдары қойылған, берекелі дастарханы жайылған, ұлттық нақышта безендірілген қазақ үйден келген қонақтарға дәм татқызды. Далақайнарлық ақсақалдар мен әжелер ауылдың алты ауызын шырқады. Мұнан кейін қазақтың қадым замандардан бері жібі үзілмей келе жатқан дәстүрі-тұсаукесер рәсімін өткізді. Ырымшыл ауылдықтар ел азаматы болсын деген ниетпен қаз-қаз тұрып, тәй-тәй басып келе жатқан баланың тұсауын Жасұлан Әлкенұлына кестірді. Ауданның атқамінер азаматына қонақжайлылықтың нақ үлгісін көрсетіп, шапан жапты.
Мұнан кейін кеш қонақтары далақайнарлықтар мен шоқпарлықтардың дайындаған, қазақылықтың иісі аңқыған көрмесін тамашалады. Көрменің сәнін қолөнер бұйымдары, ауылдың мұражайынан әкелінген көне заттар, жер емген ауылдықтардың көкөніс, жеміс-жидектері, ұлттық болмысымызды айшықтайтын дүниелер келтірді. Көз тоймайтын көрменің соңы қос ауылдың ұйымдастырған концерттік бағдарламасына ұласты.
