Өттің, дүние!

Серік аға!

Өмірдің өткінші екенін, уақытша жүрген жолаушы екенімізді сезінуге тиіспіз. Сезініп те жүрміз. Дегенмен, жалған дүниені шуағымен жылытып тұратын жақсы адамдарды көргенде фәнидің ең мазмұнды шақтарын бастан кешкендей боласың. Жалған дүниені де жақсы адамдар жылытады. Сондай көңілі таза, жайдары азаматтың бірі сіз едіңіз, Ералыұлы Серік аға!

Біз үшін «Дадабаев» деген фамилия өте ыстық. Әкем, анам, бауырларымның барлығына бұл фамилия бағалы еді. Себебі, 1980-1990 жылдары біз тұрғыны болған Талас ауданы, «Ойық» кеңшарын Ералы Дадабаев деген кісі басқарып еді. Кеңшар директоры ретінде де елдің құрметіне бөленген Ерекең кейіннен 5 жылға жуық Талас аудандық партия комитетінің бірінші хатшысы, кейіннен аудан әкімі қызметтерін де абыройлы атқарған болатын. Сіз сол кісінің үлкен баласы едіңіз. Халыққа жақын директор болған соң, әкеңіз жайлы бүкіл ақпараттар кеңшар тұрғындары үшін маңызды еді. Ол өз алдына бөлек әңгіме.

Сізбен жақынырақ танысқаным 2006 жылдар. Сіз ол уақытта Жаңатас қаласының 3 жыл әкімі болып істеп, Жуалы ауданы, Б.Момышұлы ауылдық округінің әкімі қызметіне ауысқан сәтіңіз. Ол кезде Ералы Дадабаев көкеміздің ортамызда жүрген кезі. Ақсақалға сәлем бере барғанымда «Серік деген балам Жуалы ауданында округтің әкімі» деп мақтанышпен айтып отыратын. Сол жылдары өзіңіз де облыстық «Аr –Ai» жастар газетінің редакциясына келіп тұрушы едіңіз. Мүмкін сол кездегі бас редактор Болат Бекжанмен сөйлесу үшін, бәлкім басқа шаруалар шығар. Әйтеуір 2-3 мәрте өзім қызмет ететін редакциядан сізді көргенмін. Сол кезде округ әкімі қызметі қандай болады деп сұрағанмын. Сіздің жауабыңыз да ерекше шықты. «Былай қараған кісіге ауылдық округ әкімі деген әшейін жүрген адамдай көрінеді. Ал, негізі оның жұмысынан ауыр жұмыс жоқ. Жауапкершілігі жоғары, билігі аз. Шапқылауы көп, рахметі жоқ жұмыс», — деп едіңіз. Кейінірек ұзақ жыл газет саласында істей жүріп, талай округ әкімдерімен жүздестік, жұмыстарын көрдік. Сол кезде сіздің пікірдің растығына көзіміз жетіп еді.

2008 жылы Талас ауданы әкімінің орынбасары қызметіне тағайындалдыңыз. Яғни, аудан әкімінің құрылыс, жол, тұрғын үй мәселелері бойынша орынбасары болып, кезінде әкеңің басқарған өңірге қызмет жасауға кірістіңіз. Бақандай 12 жыл осы қызметте жүрдіңіз. Аудан әкімінің орынбасары деген де алашапқын, шеті мен шегі жоқ жұмыс қой. Сіз сол ауырлыққа да, қарбаласқа да төздіңіз. Ауданда құрылыс саласы қарқынды жүріп, сол жылдары жүздеген отбасы пәтерлі болды. Жол, көпір, мектеп салу жұмыстары да қарқынды жүрді. Бір сөзбен айтқанда Таластағы 12 жылыңыз жемісті де абыройлы өтті десек, қателесе қоймаспыз.

2016 жылдың басы болу керек. Ол кезде сіздің әкеңіз, бәріміз үшін құрметті Ералы Дадабаев ақсқақал өмірден озып кеткен. Облыстық «Ғұмыр – дария» газетінің бас редакторы Жаңабай Миллионовпен келісіп, «Жақсы бір адам…» деген айдарды сол Ералы ақсақалдан бастадық. 250 жол көлемінде «Дадабаев даңғылы» деген мақала «Ғұмыр –дария» газетіне «жарқ» ете қалған. Үлкен мақала шығуын шықты. Мен өзім «Кім оқиды дейсің. Ералы ақсақал болса өмірден озып кетті» деп ойланып жүргенмін. Бір күні ұялы телефоным әндетіп қоя берді ғой. Сіз екенсіз қоңырау шалған. «Інім айналайын, «Дадабаев даңғылы» мақаласын оқыдым. Анама да оқып бердім. Әкеміз жайлы мақалаға бәріміз қуандық. Саған Әсет анамыз сәлем айтып жатыр. Жақында анамыздың 70 жылдық тойы. Соған сізді құрметпен шақырамыз» дедіңіз. Қуанып қалдым сонда. Әсет апамыздың тойына бардым. Әсет апамның да сол кездегі ықыласы ерекше болды.

Талас ауданына барған сайын өзіңізге кіріп амандасушы едім. Реті келіп жатса ауылдарды аралап қайтуға көлік те тауып беруші едіңіз. Таластықтар сіз жайлы тек жақсы пікір айтушы еді. Сол пікірді қалыптастырып жақсы жұмыс істеген өзіңіз ғой. Сайлау комиссиясын да жақсы басқардыңыз. Жамбыл ауданындағы жұмысыңыз да жақсы жүріп келе жатыр еді, аға!

Жақында қызыңыз өмірден озды. Бара алмай қалып едім. Енді өзіңіздің қазаңызды естіп есеңгіреп отырмын. Бауырларыңызға қайғырып көңіл айтамын. Сіздің орныңыз бөлек еді Серік аға! Амал қанша? Алла сізді рахымына бөлесін! Жатқан жеріңіз жайлы , топырағыңыз торқа болғай!