Кеше «Баласағұн» орталық концерт залында облыс әкімі Б.Сапарбаевтың қатысуымен «Татулықтың тірегі – Тәуелсіз ел жастары» атты жастар форумы және облыс әкімінің «Әулиеата үміті» жастар сыйлығын табыстау рәсімі өтті.
Салтанатты шарада алдымен «Әулиеата жастары» энциклопедиясының тұсауы кесіліп, LED-экраннан облыстық жастар басқармасының 2021 жылғы атқарған жұмыстары туралы бейнеролик көрермен назарына ұсынылды.
Мұнан соң «Әулиеата үміті» жастар сыйлығының номинанттарын құттықтауға сахнаға көтерілген облыс басшысы Бердібек Машбекұлы, ел сенімін арқалаған жігерлі жастарға ізгі тілегін арнады. Өз сөзінде облыс әкімі мемлекетітіміздің болашағы жастар үшін алдағы жылдары да қолдау жалғаса беретінін тілге тиек етті.
– Құрметті жас достар, іс-шараға қатысушылар! Әрбір ұлттың, әрбір мемлекеттің болашағы, дамуы бірден-бір оның білімді тәрбиелі, мәдениетті, денсаулығы мықты жастарына байланысты. Сондықтан әрбір мемлекет өздерінің жастары үшін барлық жағдайды жасайды. Қазақстанның Тұңғыш Президенті Елбасы Н.Әбішұлы бірінші күннен бастап қандай бір қиындықтар, дағдарыстар болса да жастарға көңіл бөліп, көптеген мемелекеттің ішінде тұңғыш рет Қазақстанда біздің жастардың дүниежүзінің түкпір-түкпірінде ең мықты деген жоғары оқу орындарына білім алуы үшін «Болашақ» бағдарламасын жариялады. Бағдарлама арқасында мыңдаған біздің қыз-жігіттеріміз әлемнің ең мықты деген жоғары оқу орындарында білім алып, қазір еліміздің ары қарай дамуына өздерінің үлестерін қосып жатыр. Біз де өңірде барлық жағдайларды пайланып, осы сіздер құрбыларынан, қатарластарынан қалмасын, қазіргі заманға сай білім, тәрбие алсын, өнерменен, спортпен байланыссын нысандар салып жатырмыз. Осыдан 2 жыл бұрын қабылданған «Әулиеата үміті» жастардың бағдарламасы да негізінен соған арналған. Ол бағдарламаны жүзеге асыру үшін біз арнайы бюджеттен қаржы бөлдік. Қазір оның индикаторлары толығымен орындалуда. Ары қарай ол өзінің жалғасын табады.
Сіздер білесіздер, Мемлекет басшысы Қасым-Жомарт Тоқаевтың тапсырмасына сәйкес былтырдан бастап депутаттық корпустарда мәслихаттан мәжіліске дейін жастарға квота берілді. Тек біздің облыстағы депутаттық корпуста 33 депутат бар. Ол сіздерге деген үлкен сенім.
«Әулиеата үміті» байқауының үшінші рет өткізіліп жатқаны бекер емес. Біздің жалпы қазақтың, қазақстанның үміті сіздерде! 30 жылғы Қазақстанның жеткен жетістіктерін, алған абыройын ары қарай жалғастыратын сіздерсіздер. Біз сіздерге сенеміз! Өйткені сіздердің білімдеріңіз, тәрбиелеріңіз бұрынғымен салыстырғанда басқаша. Мен сіздерді кеше өткен Тәуелсіздік мерекесімен және алдағы Жаңажыл мейрамымен шын жүректен құттықтаймын! Барлықтарыңызға денсаулық, табыс тілеймін. Әр уақытты тиімді пайдаланып, ұлтымыздың, мемлекетіміздің дамуына өздеріңіздің үлестеріңізді қосып, ата-ана үмітін ақтаңыздар! , – деді Бердібек Сапарбаев.
Сонымен комиссия шешімін Әулиетеаның бірқатар үздік жастар марапатталды. Атап айтқанда, «Үздік жас мемлекеттік қызметші» номинациясымен Жамбыл ауданы әкімі аппаратының ұйымдастыру-инспекторлық бөлімшесінің басшысы Бақытжан Құтжан, «Үздік жас ғалым» номинациясымен М.Х.Дулати атындағы Тараз өңірлік университетінің магистранты Көркемжан Қанат, «Ең үздік жас мұғалім» номинациясымен «Дарынды ер балаларға арналған мамандандырылған «БІЛІМ-ИННОВАЦИЯ» лицей-интернатының информатика пәнінің мұғалімі Алмас Тыныш, «Үздік жас спортшы» номинациясымен«Дене мүмкіндігі шектеулі адамдарға арналған спорт клубының» жүзу спорт түрінен спортшысы Нұрдәулет Жұмағали, «Үздік жас медицина маманы» номинациясымен облыстық көпбейінді аурухананың хирург дәрігері Жантөре Молдашев, «Үздік жас құқық қорғау саласының қызметкері» номинациясымен Жамбыл ауданы полиция бөлімінің тергеу бөлімшесінің аға тергеушісі, полиция капитаны Балжан Темірланқызы, «Қорғаныс саласының үздік жас қызметкері» номинациясымен Жуалы ауданының Қорғаныс істері жөніндегі бөлімі бастығының көмекшісі Дастан Аязбеков, «Үздік жас жазба ақын» номинациясымен «31» телеарнаның Жамбыл облысындағы меншікті тілшісі Нұрболат Жолдасбек, «Үздік жас айтыскер» номинациясымен Байзақ аудандық Әл-Фараби атындағы мәдениет үйіне қарасты Көктал ауылдық клубының мәдени ұйымдастырушысы Дархан Әбдіманатұлы, «Үздік жас баспа журналист» — номинациясымен «Знамя труда» газеті редакциясының тілшісі Диана Қалманбаева, «Үздік жұмысшы жас» номинациясымен «Қазақстан темір жолы» Ұлттық компаниясы» акционерлік қоғамы «Жамбыл магистралды желі бөлімшесі» филиалының Шу сигнализациясы және байланыс дистанциясының бас инженері Бақ-Даулет Базарбекұлы, «Қоғамдық қызметтегі үздік жас» номинациясымен «Таластың сөнбес сәулесі» қоғамдық бірлестігінің төрайымы Ақсұлу Байболатова, «Театр және кино саласының үздік жас актері» Асқар Тоқпанов атындағы Жамбыл облыстық қазақ драма театрының артисі Жорабек Төлеген марапатталды. Жеңімпаздарға арнайы статуэтка, диплом және ақшалай (200 мың теңге) сыйақы табысталды. Салтанатты шара облыстық филармония әншілерінің концертімен жалғасты.
Айжан Өзбекова
