«ҚҰҚЫҒЫҢДЫ БІЛ, МІНДЕТІҢДІ ОРЫНДА!» КӨПБАЛАЛЫ АНАЛАРМЕН TED-x ФОРМАТЫНДА КЕЗДЕСУ ӨТТІ
Жамбыл облыстық «Анаға тағзым» отбасын қолдау орталығында Қазақстан Республикасы Конституциясының 30 жылдығына орай көпбалалы аналармен TED-x форматында «Құқығыңды біл, міндетіңді орында!» атты ерекше кездесу өтті.
Жиынды Жамбыл облысы әкімдігінің жұмыспен қамтуды үйлестіру және әлеуметтік бағдарламалар басқармасына қарасты қос мекеме — Жамбыл облыстық «Анаға тағзым» отбасын қолдау орталығы және Еңбек мобильдігі орталығы бірлесіп ұйымдастырды.
Кездесудің негізгі мақсаты – азаматтардың, әсіресе әйел-аналардың құқықтық сауаттылығын арттыру, олардың құқықтары мен міндеттері туралы түсініктерін кеңейту.
Жамбыл облыстық “Анаға тағзым” отбасын қолдау орталығының директор орынбасары Баян Муртазаева жиынды салтанатты түрде ашып, қатысушыларды келе жатқан Конституция күнімен құттықтады. Құқықтық сауаттылық турасында ақпарат беретін спикерлермен таныстырды.
Кездесуге заң саласының майталманы, Сот жүйесінің ардагері Қайманова Уәлиға Қайманқызы, Тараз қаласы бойынша Мансап орталығы директорының орынбасары Кембаев Ерғали Асанбайұлы және «Отбасы банк» кеңесшісі – Қойбакишева Аяна Назарбекқызы қатысып, баяндама жасады.
Спикерлер өз сөздерінде аналардың еңбек құқықтары, әлеуметтік қолдаулар, сотқа жүгіну тәртібі және тұрғын үй мәселелері бойынша құқықтық түсіндіру жұмыстарын жүргізді. Әсіресе, көпбалалы отбасыларға арналған мемлекеттік бағдарламалар мен әлеуметтік жәрдемақыларға қатысты сұрақтарға толыққанды жауаптар берілді. Сонымен қатар, кездесу барысында өзекті әлеуметтік мәселелер талқыланып, қатысушыларға құқықтық қолдау көрсетілді. Кездесу ашық пікір алмасу мен сұрақ-жауап форматында өтіп, қатысушылар құқықтық кеңес алу мүмкіндігіне ие болды.
Гүлзада Қырықбаева
БАҚ және жұртшылықпен
жұмыс маманы.
