Осы аптада аудандық Төтенше жағдайлар бөлімі тарапынан 2025–2026 жылғы қысқы дайындық кезеңіне байланысты ауданның шұғыл әрекет ету жасағының дайындығы тексерілді. Іс-шара Мойынқұм ауылының Орталық алаңында өтті.
Тексеру барысында жасақ құрамындағы 15 дана техника мен 45 қызметкердің қысқы кезеңдегі төтенше жағдайларға дайындық деңгейі қаралды. Арнайы құрал-жабдықтармен жарақтандырылуы, байланыс жүйелерінің жұмыс істеу қабілеті, жеке құрамның іс-қимыл дағдылары мен киім жабдықтарының толықтығы назарға алынды.
Шараға аудан әкімінің орынбасары Қуандық Төлеубеков қатысып, техникалық құралдардың жай-күйімен және жеке құрамның қыс мезгіліндегі төтенше жағдайларға әзірлігін бағалады. Ол өз сөзінде қысқы маусымда тұрғындардың қауіпсіздігін қамтамасыз ету – маңызды міндеттердің бірі екенін атап өтіп, жауапты қызметтерге үздіксіз дайындықты сақтау қажеттігін тапсырды.
Мұндай тексерулер алдағы суық мезгілде аудан аумағында төтенше жағдайлардың алдын алу және олардың салдарын жедел жою мақсатында ұйымдастырылып келеді.
Айдос ҚОСЫБАЙ,
Мойынқұм ауданы
