16-сәуір күні Техникалық шығармашылық және кәсіби бағдар беру орталығына облыстың түкпір-түкпірінен жас өнертапқыштар жиналды. Олардың басын қосқан «Техникалық және өнертапқыштардың» облыстық байқауы. Ғылым мен жаңа технологияға бір табан жақын оқушылар бірнеше номинация бойынша таңертеңнен бері техникалық көліктерімен (әуе,кеме,зымыран,авто көлік) жарысып, әділқазылар мен көптің назарына ұсынды. Оның ішінде қолдау тапқан жағдайда қоғамдағы жұмысты жеңілдететін пайдасы мол жаңашыл техникалар көп. Атап өтсек, радиомен басқарылатын авто, автотрассалық әуе, кеме және зымыран модельдерінің түрлі кластары бар. Оқушылар бұл байқауға тыңғылықты дайындалып келген әрі төл туындыларын жоғары деңгейде қорғап шықты.
Бұл өз кезегінде өңірде білім саласы тарапынан отандық өнертапқыштардың білімдерін тереңдетіп, мүмкіндіктерін кеңейтуге жыл сайын ерекше көңіл бөлініп жатқанын айғақтаса керек. Ал, жаңашылдыққа бет бұрған жастар мұндай мүмкіндікке дән риза. Өйткені, олар әр байқау сайын бір-бірімен тәжірибе алмасып, технология саласында тың дүниелерді меңгеруде. Ал, бүгінгі жарыста әр номинация бойынша жүлделі 1,2,3 орын иелері анықталып олар Дипломмен марапатталды. Оқушыларды жылдап дайындап жүрген ұстаздардың да еңбектері еленіп « Алғыс хаттар» табысталды. Оқ бойы оза шыққан үздіктер енді дәл осы байқаудың республикалық кезеңінде облыс намысын қорғайтын болады.