Қартын қадірлеп, ақсақалын сыйлап, анасын құрметтеген халқымыз үшін 1-қазан орны бөлек дәстүрді жаңғыртып, ғұрыпты дәріптейтін күн ретінде мерекеленіп келеді. Бұл күні қоғам назары қарттарға ауып, солардың жүрегін жылытуға асығады. Қарияларды әрдайым қадір тұтатын жастар жыл бойы атқарылатын акциядан бөлек, осы күнді сауапты істермен өткізді десек артық айтпаған боламыз.
Жақсы іске жұмыла кететін, әрдайым көмекке дайын №10 Шу колледжі мен «Шу теміржол колледжі» студенттерінің қатысуымен қазан айының 1-і күні жалғыз тұратын қарттардың үйлеріне барып, көмек көрсетілді. Атап айтқанда, Мейрамкүл Нарбекова, Раиса Қамарова атты аналардың үйіне 25 студент барып, қолғабыс тигізіп, баталарын алып қайтты. «Қарттарым асыл қазынам» атты бұл акцияның мақсаты — үлкенге құрмет көрсетіп, ата-баба дәстүрін сабақтастыру, жастарды қарттарға қамқорлыққа баулу болып табылады.
Дәл осындай игілікті шара Қонаев, Жаңа жол, Мойынқұм ауылдарында да өтіп, мерекенің мазмұнын аша түсуге атсалысты.
М.ЖҰМАНОВА,
аудан әкімдігі ішкі саясат бөлімінің «Жастар ресурстық орталығы» КММ ұйымдастыру және бақылау бөлімінің аға инспекторы.
