Осы аптаның сәрсенбісінде аудан әкімінің төрағалығымен кезекті аппараттық кеңес өтіп, онда ауыл шаруашылығы, мәдени іс-шаралар мен бірқатар тапсырмалардың орындалу барысы қаралды.![]()
Кеңестің алғашқы баяндамасын аудандық статистика басқармасының басшысы Бауыржан Жақсымбетов жасады. Ол биылғы өтетін Ұлттық ауыл шаруашылығы санағына дайындық барысына тоқталып, бұл маңызды науқанның ерекшеліктері мен кезеңдерін түсіндірді. Санақ 1 тамыз бен 31 тамыз аралығында өтеді. Алғашқы кезеңде sanag.gov.kz платформасы арқылы онлайн сауалнама жүргізілмек. Ал онлайн форматта тіркелмеген респонденттермен интервьюерлер бетпе-бет жұмыс істейтін болады.![]()
Баяндамашының айтуынша, бұл санақ – еліміздің аграрлық секторы бойынша өзекті әрі нақты мәліметтер алуға мүмкіндік беретін ауқымды статистикалық шара. Ауыл әкімдері ақпараттық-түсіндіру жұмыстарын белсенді жүргізіп, интернетке қосылған компьютерлер мен өзіне-өзі қызмет көрсету бұрыштарын ұйымдастыруы тиіс. Биылғы санақта аудан бойынша 1269 ауыл шаруашылығы өндірушісі және 849 үй шаруашылығы қамтылуы қажет. Осы мақсатта 2 инструктор жұмысқа қабылданып, бір орын бос тұр, ал 20 қыркүйек пен 20 қазан аралығында 15 интервьюер тартылады деп жоспарлануда.
Кеңес барысында аудан әкімдігінің ішкі саясат бөлімінің басшысы Жанар Несіпбаева ауданның 60 жылдық мерейтойына арналған мәдени-көпшілік іс-шаралардың дайындық барысын баяндап, жоспарланған жобалар мен олардың жүзеге асу кестесі туралы хабардар етті. Мерейтой аясында әр округ өз тарихын, дәстүрін және ерекшелігін көрсететін мазмұнды шаралармен қатыспақ.
Кеңес соңында қатысушылар тарапынан сұрақтар қойылып, тиісті жауаптар берілді. Аудан әкімі Ермек Карентаев аппараттық кеңесті қорытындылай келе, барлық сала басшыларына берілген тапсырмаларды сапалы әрі уақытылы орындауды тапсырып, тұрғындармен тиімді жұмыс істеуді және бастамаларға жауапкершілікпен қарауды міндеттеді.
Елдос ЕРҒАБЫЛҰЛЫ,
Мойынқұм ауданы
