Әзербайжан президенті Ақтаудағы ұшақ апатынан кейін Ресейге қандай шарт қойылып отырғанын айтты, — деп хабарлайды Massaget.kz тілшісі Minval-ға сілтеме жасап.
29 желтоқсанда Ильхам Әлиев Әзербайжан телеарнасына халықаралық әуежайда сұхбат беріп, Ақтау маңындағы ұшақ апатына қатысты пікір білдірді. Ол 27 желтоқсанда Әзербайжан тарапы өз талаптарын ресми түрде Ресейге тапсырғанын мәлімдеді.
«Бұл талаптардың мәні неде? Біріншіден, Ресей тарапы Әзербайжаннан кешірім сұрауы керек. Екіншіден, өз кінәсін мойындауы керек. Үшіншіден, кінәлілер жазаланып, қылмыстық жауапкершілікке тартылуы керек. Әзербайжан мемлекетіне, зардап шеккен жолаушыларға және экипаж мүшелеріне өтемақы төленуі керек. Бұл — біздің шарттарымыз. Олардың біріншісі кеше орындалды. Біздің қалған шарттарымыз да орындалады деп үміттенемін», — деді Әзербайжан президенті.
Ол бұл шарттардың барлығы әділ екенін мәлімдеді.
«Бұл жерде артық ештеңе жоқ, бәрі халықаралық тәжірибеге және адамгершілік қағидаларына негізделген. Тағы да қайталаймын, Әзербайжан жұртшылығына бұл істің барлық анық-қанығы хабарланады. Бұл шарттар сіздер арқылы көпшілікке жетеді. Тағы да қайталаймын, біздің шарттарымыз қабылданады деп үміттенемін», — деп түйіндеді Әзербайжан президенті.
Ақтаудағы ұшақ апаты туралы не белгілі?
Еске салайық, 25 желтоқсанда Ақтау маңында Бакуден Грозныйға ұшып бара жатқан ұшақ апатқа ұшырады. Бұл — Azerbaijan Airlines әуекомпаниясына тиесілі Эмбраер 190 ұшағы. Алдын ала ақпарат бойынша ұшақ бортында 67 адам, оның ішінде 5 экипаж мүшесі болған.
Кейінірек Қазақстанның Төтенше жағдайлар министрлігі өкілдері оқиға орнына барды. Құтқарушылар жеткен кезде ұшақ жанып жатқан.
Қазақстанның Көлік министрлігі де төтенше жағдайға байланысты мәлімдеме жасады. Ал әлеуметтік желіде оқиға орнынан видеолар тарады.
Кейінірек ТЖМ оқиға орнындағы өрт сөндірілгенін хабарлады. Маңғыстау облысының әкімі Нұрдәулет Қилыбай ұшақ апаты болған жерге барды.
Көлік министрлігі ұшақ бортында болған адамдар жөнінде алдын ала мынадай ақпарат жариялады: бортта 37 Әзербайжан, 6 Қазақстан, 3 Қырғызстан, 16 РФ азаматы болған.
Президент Қасым-Жомарт Тоқаевтың тапсырмасымен ұшақ апатына қатысты комиссия құрылды. Комиссия құрамына премьер-министрдің орынбасары, Маңғыстау облысының әкімі, төтенше жағдайлар, көлік, сыртқы істер, ішкі істер, еңбек және халықты әлеуметтік қорғау, денсаулық сақтау министрліктерінің басшылығы, Бас көлік прокуроры кірді.
Көліктегі Полиция департаменті төтенше жағдайға байланысты қылмыстық іс қозғады.
Маңғыстау облыстық Денсаулық сақтау басқармасының алдын ала мәліметі бойынша 4 адам қаза тапқаны расталған.
Ақтау маңындағы ұшақ апатынан аман қалғандардың видеосы тарады.
Ал Azerbaijan Airlines жолаушылардың тізімін жариялады. Аман қалған 29 адам бар, оның ішінде 2-еуі — бала.
Ақтаудағы ұшақ апатына қатысты Бас прокуратура мәлімдеме жасап, оқиға орнына елдің Бас көлік прокуроры барғанын хабарлады. Қылмыстық іс Қазақстан Республикасы Бас прокурорының ерекше бақылауында.
Мемлекет басшысы Қасым-Жомарт Тоқаев Әзербайжан президенті Ильхам Әлиевке көңіл айтып, мемлекеттік комиссия тиісті шаралар қабылдап, Әзербайжан тарапына көмек көрсететінін мәлімдеді.
Фото: gov.kz
https://massaget.kz/news/azerbayjan-prezident-reseyge-kanday-shart-koyyip-otyirganyin-122885/?fbclid=IwY2xjawHegMdleHRuA2FlbQIxMQABHVVp_gzSJUQ0CW7QpCbr34vaqihzTi546CUxUIPVIXN_qLOMBGLNzeARKg_aem_cMNX8Jut2u590nIzYHG0GQ
