Марқай, қазақ! Жаса ел боксы! Нұр-Сұлтан мен Алматы қалаларының төрінде Елорда күнінен орай түндігін түрген кәсіпқой бокс кештерінде оғланымыз қарсыластарын қоғаша жапырып, қазақтың күрзі жұдырығын танытты. Ал мемлекет мақтанышы Қанат Ислам доминикалық Хулио де Хесусты 14 секундта нокаутқа жіберіп, төбемізді көкке жеткізді. Сондай-ақ жерлесіміз Жанқош Тұраров та аргентиналық Максимилиано Годойды үшінші раундта сұлатып түсіріп, WBO Inter-Continental белбеуін иеленді.
Бәрін басынан бастасақ, Балуан Шолақ атындағы бокс кешенінде өткен алыптар айқасы еліміздің ғана емес, әлем сарапшыларының қызығушылығын оятты. Ал Нұр-Сұлтан қаласындағы кәсіпқой бокс кешін британдық MTK Global компаниясы мен америкалық Top Rank ұйымы ұйымдастырды. Сондықтан бұл күні төрткүл әлемнің бокс сүйер қауымының назары Қазақстанға ауды десек артық айтқанымыз емес. Оған қоса, Алматыдағы аламанда еліміздің он бірдей боксшысы шаршы алаңға көтеріледі деп жоспарланғандықтан, спорт кешені жанкүйерлерге лықа толды. Олардың қатарынан атақты эстарада жұлдыздары мен мемлекет қайраткерлері де табылды.
Қош, сонымен кәсіпқой бокс кешінінің басты жекпе-жектерінің бірі саналған Қанат Ислам мен доминикалық Хулио де Хесус шаршы алаңға беттегенде жанкүйерлердің қиқуынан құлақ тұнды. «Қазақ» деген лақап атпен белгілі отандасымыз Қанат ұлтымызға тән салтпенен үстіне оюлы шапан киіп, алаңша ойқастай көтерілді. Бұған дейін 26 кездесу өткізіп соның тек біреуінде ғана жеңіліс тапқан доминикалық боксшы да өзіне сенімді екенін көрсетіп, көпшіліктің қолдауын сұрады. Алайда Хулионың шамасы бірінші раундта-ақ белгілі болып қалды. Гонг үні естілген бойы Қанат қарсыласына оқ жыланша атылып, бірден жұдырықтың астына алды. Сериялық соққылары бірінен кейін бірі нысанаға дөп тиіп, 14-секундта доминикалық боксшы жер жастанды. Тіпті Хулио бір минутқа дейін есін жия алмай, орнынан тұра алмады. Осылайша Қанат спорттық мансабындағы 26-шы жеңісіне қол жеткізіп, WBO Inter-Continental белбеуін иеленді. Бұл сөз жоқ, Қанаттың қанатын биіктерге қақтыратыны анық.
Алматы қаласындағы бокс кешінің андеркардында Қанаттан бөлек, 9 қазақ боксшысы шаршы алаңға шықты. Олардың барлығы да жеңіске жетті. Атап айтсақ, Сапарбай Айдаров, Бексұлтан Раушанов, Берікбай Нұрымбетов, Арман Рысбек, Нұрсұлтан Аманжолов, Асқар Ерубек, Абылайхан Құсайынов, Руслан Мырсатаев және Мадияр Әшкеев сәтті кездесулер өткізіп, әлемдік рейтингтегі жағдайларын жақсартты.
Жеңімпаздарды ел Президентті Қасым-Жомарт Тоқаевтың баспасөз қызметінің жетекшісі Берік Құрманғали құттықтап келіп, мұндай аламандарға мемлекет тарапынан алдағы уақытта да қолдау болатындығын айтты.
Араға бір күн салып дәл осындай байрақты бәсекенің Нұр-Сұлтан қаласында жалауы желбіреді. Британдық MTK Global компаниясы мен америкалық Top Rank промоутері ұйымдастырған бокс кешінің басты жекпе-жегінде жерлесіміз Жанқош Тұраров өнер көрсетті. Бұған дейін 23 «бой» өткізіп, бірде-бір рет жеңіліс таппаған Жанқош бұл жолы аргентиналық Максимилиано Годоймен қолғап түйістірді. Годойда бастапқыда оңай шағылатын жаңғақтай көрінбеген. Себебі бұған дейін 31 кездесу өткізсе, соның 16-ын нокаутпен аяқтаған. Сондықтан жамбылдық жанкүйерлер тақым қысып, жерлесіміздің тілеуін тіледік.
Жалпы жекпе-жек 10 раундқа жоспарланған болатын. Алайда алғашқы минуттардан шапшаң қимылдаған Жанқош екі раунд бойы қарсыласын әбден шаршатты. Арагідік джеб пен хуктарын дөп тигізіп, аргентиналыққа бесінші бұрышты іздетті. Ал үшінші раундта бір соққысымен Максимилианоны еденге етпетінен жатқызды. Төреші онға дейін санағымен, Годой сол бойы көтеріле алмады. Нәтижесінде 28 жастағы жерлесіміз 24-ші жеңісіне қол жеткізіп, жартылай орта салмақтағы WBO Inter-Continental екінші деңгейлі титулына ие болды. Айта кетейік, Жанқоштың бұл 17-рет қарсыласын нокаутпен ұтуы. Осыдан-ақ батыр ұлымыздың әлеуетін бағамдай беріңіз. Ал 29 жастағы Годой спорттық мансабындағы бесінші жеңілісінің ащы дәмін татты.
Бұл күні отандасымыз Нұртас Әжбенов те грузиялық Ачико Одидадзені бірінші раундта нокаутқа жіберіп, мерейімізді тасытты. Кәсіпқой бокста небәрі бесінші жекпе-жегіне шағып отарған Нұртас барлығында жеңіске жетіп отыр. Демек, Әжбеновтің де болашағынан зор үміт күтсек болады деген сөз.
Әрине, қазақ боксы қай кезде де өз биігінен түскен емес. Қазақтың жойқын жұдырығынан кәрі құрлық ғана емес, теңіздің арғы бетіндегі елдер де сескенені. Өз төрімізде өткен байрақты бәсекеде оғландарымыз тағы бір мәрте қазақ боксының әлеуетін көрсетіп, абыройымызды асқақтатты.
Жарайсыңдар, жігіттер! Бұл Нұр-Сұлтан күніне теңдессіз тарту болғаны
даусыз.
С.Сатылғанов
