Бүгін облыс әкімінің орынбасары Қанатбек Мәдібек жұмыс сапарымен Байзақ және Жамбыл аудандарында болды. Оны аудан әкімінің міндетін атқарушы Қуаныш Бүркітәлиев күтіп алды.
Қанатбек Қайшыбекұлы Диқан ауылдық округінде орналасқан «Алди и К» ЖШС-і тұрмыстық қатты қалдықтарды қайта өңдеу және сұрыптау орнындағы цехтардың жұмыстарымен танысты. Жалпы 13 гектарды алып жатқан аумақта полиэтилентерефталата өнімдері мен пластмасс өнімдерін турау және жуу цехы жұмыс істеуде.
Аталған серіктестің жетекшісі «Жасыл даму» қоры тарапынан жүзеге асырылуы күтіліп отырған жаңа жобалардың барысы туралы баяндап берді. Алдағы уақытта осынау жоба «Жасыл даму» қоры тарапынан қолдау тапқан кезде мұнда екі ангар құрылысы жүргізілетін болады. Онда пластмасс өнімдерін түйіршіктеу, пакет шығару, автомобиль көліктерінің дөңгелектерін турау және ұнтақтау цехтары ашылып, сұрыптау желісі іске қосылып, қоқыстарды автоматты түрде сұрыптайды. Сондай-ақ 9 дана арнайы қоқыс тасымалдайтын техникалар алу жоспарлануда.
Жаңа жобамен жан жақты танысқан облыс әкімінің орынбасары көршілес Жамбыл ауданына аттанып кетті.
