Елордамыз Нұр-Сұлтан қаласының туған күніне орай «Тараз-Арена» спорт кешенінде облыстық этномәдени бірлестіктер арасында Қазақстан халқы ойындарынан облыстық спартакиада өтті.
Ұлттар достығын насихаттап, ынтымақтастықты нығайтуды көздеген спартакиадаға барлығы 7 команда қатысып, спорттың 4 түрінен сынға түсті.
Спартакиаданың ашылуында облыс әкімдігі дене шынықтыру және спорт басқармасы басшысының орынбасары Нұржан Жолдасбеков пен облыс әкімі аппаратының «Қоғамдық келісім» мекемесінің басшысы Рано Убайдуллаева сөз сөйлеп, қатысушыларға сәттілік тіледі.
Бұдан кейін этнос өкілдері ең алдымен «Арқан тартудан» бәсекелесті. Аталған айналым бойынша бірінші орын ұйғыр этносының өкілдеріне бұйырса, екінші орынды Меркі ауданы, ал үшінші орынды өзбек этносы иеленді. «Дойбы» ойыны бойынша бірінші орынды қарашай-балқарлар этносы жеңіп алса, екінші орынды Меркі ауданы, үшінші орынды украин этносы қанжығалады. «Үстел теннисі» ойынынан бірінші орын украйн этносына, екінші орын неміс этносына, үшінші орын ұйғыр этносына бұйырды. Ал балалар арасында өткен эстафеталық ойындарда меркілік бүлдіршіндер бірінші орынның биігінен көрінсе, украиндық балғындар екінші орынды, ал ұйғыр этносының бүлдіршіндері үшінші орынды еншілеріне жазды.
Спартакияданың жалпы командалық есебі бойынша бірінші орынды «Дніпро» украин этномәдени бірлестігі олжаласа, екінші орын Меркіден келген командаға бұйырды. Үздік үштікті «М. Қашқари» атындағы ұйғыр этномәдени бірлестігі түйіндеді.
Жеңімпаз командаларға дипломдар, кубоктар және бағалы сыйлықтар табыс етілді. Ал спартакиада соңы «Болашақ» вокалдық триосының «Мен, сен бәріміз» әнімен қорытындыланып, көпшілік естелік суретке түсті.
С.Сатылғанов
