Тараз қаласында оқушыларға сапалы әрі қолайлы орта қалыптастыруға бағытталған кешенді жұмыстар жүргізілуде. Қалада жаңа мектептер салынып, қолданыстағы білім беру ұйымдары кеңейтіліп, жаңғыртылуда.
«Шөлдала» алқабында жобалық қуаты 600 орындық жаңа мектептің құрылысы жүзеге асырылуда. Жобаның тапсырыс берушісі – «Samruk-Kazyna Construction» АҚ, мердігері – «Агроспецстрой» ЖШС. Құрылыс құны 4 млрд 256 млн теңге. Құрылыс жұмыстары 2023 жылғы 6 қазанда басталып, 2025 жылғы 1 тамызда аяқталады деп жоспарланған. Мектеп 2025 жылғы 1 қыркүйекте пайдалануға беріледі.
Жаңа мектепте 50 оқу кабинеті, екі спорт залы, 160 орындық мәжіліс залы, асхана, STEM және робототехника кабинеттері, зертханалар, кітапхана, шеберханалар мен коворкинг орталықтары қарастырылған. Оқыту тілі – қазақ тілі.
Сонымен қатар, М.Мәметова атындағы №27 орта мектепте 600 орындық үш қабатты жаңа ғимараттың құрылысы жүргізілуде. Жобаның құны 3 млрд 587 млн теңге, құрылыс мерзімі – 17 ай. Қазіргі таңда демонтаж және қазаншұңқыр қазу кезеңдері аяқталып, қабырғаларды көтеру жұмыстары атқарылуда. Құрылыс-монтаж жұмыстарының орындалу деңгейі 25 пайызды құрайды. Жаңа ғимаратты 2026 жылдың қарашасында пайдалануға беру көзделген. Құрылыс кезеңінде оқу процесі уақытша екі мектептің базасында ұйымдастырылған.
№7 мектеп-гимназиясы аралас тілде білім беретін, жобалық сыйымдылығы 940 орындық оқу орны. Мұнда 1627 оқушы білім алып, 130 педагог еңбек етеді. Білім сапасы 74,1 пайыз деңгейінде. Мектептің материалдық-техникалық базасына зертханалар, IT және робототехника кабинеттері, спорт залдары, кітапхана, асхана және бейнебақылау жүйелері кіреді.
Соңғы жылдары мектепте жөндеу жұмыстары жүргізіліп, 2025 жылдан бастап 300 орындық қосымша оқу ғимараты мен АКТ залының құрылысы басталды. Аяқталу мерзімі – 2025 жылғы 4 қараша.
Аталған жобалар қаладағы оқушы орындарының тапшылығын азайтып, білім сапасын арттыруға, балалар үшін қауіпсіз әрі қолайлы оқу ортасын қалыптастыруға бағытталған.
