Бүгінгі таңда жаңа заң немесе кодекс қабылданса, қоғамның оған бірден бой үйретуі қиын құбылыс. Сондықтан оны әрдайым еске салып, жиындарда таныстырып, түсіндіру жұмыстарын жүргізіп отыру қажет.
Биылғы жылдың шілде айынан бастап Қазақстан Республикасының «Әкімшлік рәсімдік-процестік кодексі» қабылданып, күшіне енді. Бұл кодексте ілгерідегі «Әкімшілік рәсімдер» және «Жеке және заңды тұлғалардың өтініштерін қарау тәртібі» туралы заңдарды алмастырып, осы екі заңдағы нормаларды жетілдіріп,толықтырылған.
Апта басында аудан әкімі аппаратының кіші мәжіліс залында аталған кодексті кеңінен түсіндіру бойынша ауқымды жиын өткен болатын. Жаңа кодекстің жай-жапсарын түсіндіру үшін Жамбыл облыстық соттың судьясы Оспан Мамытбеков арнайы келіп қатысқанын айта кету керек.
Аудан әкімінің орынбасары Н.Жақсыбаев жиынды ашып, мәжіліске қатысушы аудандық соттың төрағасы мен судьяларына, ауданаралық және көлік прокурорларына, құқық қорғау органдарының басшыларына, мемлекеттік кіріс басқармасының өкілдеріне, медиаторларға,қорғаушыларға, сот орындаушылар мен округ әкімдеріне қонақты таныстырып, сөз тізгінін берген болатын.
Тура осындай тұлғалардың топтасуымен көршілес жатқан Мойынқұм ауданы да бейнебайланыс арқылы қосылып, спикер-дің сөзіне құлақ салып отырды.
Оспан Мұсабекұлы әкімшілік рәсімді жүзеге асыруға жауаптыларға шешім қабылдауда қырағылық танытып, істі сотқа дейін сауатты түрде қарау керек екенін атап өтті. Сондай-ақ кодекске сәйкес мемлекеттік орган мен шағымданушы арасында татуластыру мүмкіндігі бар екенін тілге тиек етті. Жеке сот орындаушыларына өз істеріне мұқият болуларын түсіндірді. Әрбір әрекет осы кодексте көрсетілген нормалар бойынша жүзе асуы тиіс екенін де ескертті.
Жиын соңында аудандық соттың төрағасы Ернар Жаманқұлов ескі заңды естен шығара алмай жүргендер бар екенін айтып, оларды жаңа кодекспен жұмыс істеуге шақырды. Бұл кодекс әрбір қызметкердің тартпасында тұруы тиіс. Көкейдегі кез келген сұраққа осы кодекс жауап беретінін атап өтті.
Мойынқұм ауданы тарапы да Оспан Мұсабекұлына алғыс білдіріп, бұл бағытта нақты жұмыс атқарылады деп сендірді.
