Аудан әкімі М.Сұлтанғалиевтің тұрғындар алдындағы есепті кездесуі Жаңаарық ауылдық округінде жалғасты.Ұ.Сыздықбайұлы ауылдық клуб үйінде өткен есепті жиынға аудан әкімдігінің тиісті бөлімдері, мекеме басшылары және жергілікті тұрғындар қатысты.Жалпы, аудан орталығына жақын орналасқан Жаңаарық та жыл санап Жаңатаспен бірге жаңғырып келеді. Онысын аудандағы соңғы үш жылда атқарылған жұмыс нәтижесінен көруге болады. Мың алты жүзден аса тұрғыны бар ауылдық округте өзге елдімекендермен салыстырғанда демографилық өсім айтарлықтай жоғары. Жыл басынан бері 29 сәби өмірге келген.
Жаңаарықта жергілікті тұрғындардың дені – кәсіпкер. Осы ретте «Нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған «Еңбек» мемлекеттік бағдарламасын іске асыру да жақсы жолға қойылған. Аталған бағдарлама аясында соңғы 2 жылда «Ауыл шаруашылығын қаржылай қолдау қоры арқылы» 20 адам 87,2 миллион теңге несие алған. Ал, «Бастау – бизнес» бағдарламасы бойынша (200) АЕК қаржы көлемінде 65 азамат жеке кәсібін бастаған.Есепті кездесудің күн тәртібі бойынша, әуелі ауылдық округ әкімі Қуандық Алдабергенов 2021 жылы атқарлыған жұмыстар туралы баяндама жасаса, екінші кезекте аудан әкімі Марат Сұлтанғалиев өңірде өріс алған барлық салалық бағыттағы оң динимиканы хабарлады.Жиын соңында ауылдық ардагерлер кеңесінің төрағасы Жұмашбек Әділбеков ауыл мен аудан әкімдерінің есебіне, жыл ішінде атқарған жұмыстарына оң бағасын беріп, істеріне табыс тіледі. Сондай-ақ, кездесуде сөз алған «Жаңа күш» шаруа қожалығының төрағасы Е.Біркенов аудан әкіміненен ауыл шаурашылығына қатысты мемлекеттік бағдарламаларды, олардың тиімді тұстарын түсіндіру жұмыстарын жүргізуді сұрады. Бұл бойынша аудан әкімі Марат Қырғызәліұлы жиынға қатысқан ауыл шаруашылығы бөлімінің басшысы Сейілбек Дариябековке тиісті тапсырмалар берді.Жиын барысында жергілікті тұрғындары алаңдатқан мәселе – ауыл іргесіндегі цемент зауытының құрылысы, яғни оның экологиялық зияны. Халықтың наразылығын тудырған бұл мәселе бойынша аудан басшысы алдағы уақытта қайта «Қоғамдық тыңдау» өтетіндігін мәлімдеп, арнайы эколог-эксперт мамандар зерттеу жүргізетінін жеткізді.
Сарысу ауданы әкімдігінің баспасөз қызметі