Аграрлы аймақ саналатын Жамбыл өңіріндегі көктемгі егін науқанына дайындық ерте басталады. Қамданғанның қапы қалмайтынын білетін сала мамандары қазір вегетация кезеңіне дайындық жұмыстарын үдете түскен.
Диқандарды ала жаздай ағын сумен қамтамасыз ету міндетін мойнына алған «Қазсушар» мекемесінің Жамбыл облыстық филиалының қызметкерлері каналдарды күл-қоқыстан тазартуда. Сонымен бірге гидротехникалық құрылымдардың су өткізу қабілетін арттыруға да баса назар аударылуда. Су жүйелерін тазарту жұмыстарына арнайы техникалар да тартылған.
Өткен жылдағы ағын судың тапшылығы шаруалар мен бірге сала мамандарына үлкен сабақ болды. Сондықтан қазіргі таңда қолға алынған жұмыстар ағын судың техникалық шығымын азайтуға бағытталған.
