Жамбыл облысында «Respublica» партиясының облыстық филиалы ұйымдастырған жаңа конституциялық реформаны түсіндіру бойынша сараптамалық жиын өтті. Оған партия мүшелері, «Re.Women» әйелдер қауымдастығы, «Re Jastary» жастар қанатының белсенділері және бастауыш партия ұйымдарының төрағалары қатысты.
Іс-шарада реформаның негізгі бағыттары, елдің саяси және әлеуметтік-экономикалық дамуы үшін стратегиялық маңызы, сондай-ақ ұсынылып отырған өзгерістерді іске асыру жолдары кеңінен талқыланды. Жиынды ашқан «Respublica» партиясының Жамбыл облыстық филиалы төрайымы Келімбетова Айнұр Шайзханқызы құқықтық мемлекетті нығайту, мемлекеттік органдардың ашықтығы мен есептілігін арттыру және азаматтардың қоғамдық-саяси өмірге белсенді қатысуын қамтамасыз етудегі реформаның стратегиялық маңызын атап өтті.
Қатысушылар мемлекеттік институттарды жаңғырту, өкілді органдардың рөлін күшейту, қоғамдық бақылау тетіктерін жетілдіру және лауазымды тұлғалардың жауапкершілігін арттыру мәселелеріне ерекше мән берді. Олар конституциялық өзгерістердің басқаруды ашық, әділ және тиімді етуге бағытталғанын баса айтты.
Партияның «Re.Women» әйелдер қауымдастығы төрайымының орынбасарлары Мамбеталы Ақбота мен Алиева Лейла реформаның гендерлік теңдікті нығайтуға, әйелдердің саяси көшбасшылығын арттыруға және шешім қабылдау процесіне қатысуға қосымша мүмкіндіктер беретінін айтты. «Re Jastary» жастар қанатының белсендісі Мұқан Аружан жастарды реформалау үдерістеріне тартудың маңыздылығын ерекше атап өтті.
Ашық пікір алмасу барысында қатысушылар сарапшыларға сұрақ қойып, реформаны өңірлік деңгейде іске асыру жолдары бойынша ұсыныстарын білдірді. Жиын соңында қатысушылар ақпараттық-түсіндіру жұмыстарын жалғастырып, қоғамдық диалогты дамытуға және реформаларды іске асыруға белсенді атсалысуға дайын екендіктерін жариялады.
