Фото: freepik.com
Министрдің айтуынша, жалға берілген тұрғын үйді сатып алу құқығы бірінші кезекте осы пәтерлерде бес жыл бойы тұрып жатқан азаматтарға беріледі.
Қанат Шарлапаев бұл мерзімдердің әлі де нақты емес екенін айтты. Оның айтуынша, қазақстандықтардың жалға берілетін баспананы қаншаға сатып алатыны өте үлкен мәселе.
«Қазір біз бұл баспаналарды нарықтық құнымен емес, баланстық құнымен сатып алуды қамтамасыз ету үшін кеңестер жүргізіп жатырмыз. Бұл осы пәтерлерде тұратын адамдарға түсетін қаржылық ауыртпалықты жеңілдету үшін», – деді Шарлапаев.
Сондай-ақ министр түзетулер мәжіліске тек 17 қыркүйекте жіберілгендіктен, бұл мәселе бойынша нақты ақпарат беруге әлі ерте екенін айтты.
Министрдің айтуынша, Қазақстанның кейбір азаматтары баспанаға бірнеше рет кезекке тұрып, бірнеше пәтер алады. Ережеге сәйкес, әрбір адам мемлекеттік тұрғын үй алуға өтінішін бес жылда бір рет қана қайта тіркей алады.
