Алғыс айту күні қарсаңында жамбылдық этномәдени бірлестіктердің белсенді жастары Тараз қаласындағы «Қан орталығына» барып қан тапсырды. Еріктілердің қатарында облыстық «Жаңғыру жолы» республикалық жастар қозғалысының өңірлік штабының өкілдері мен «Ақ желкен» жастар лигасының белсенді жастары болды.
«Өмір сыйла» атауымен ұйымдастырылған шарада қолдарына Ассамблея жалауын ұстаған жастар еліміздің Тұңғыш Президенті атындағы саябақтан бастап «Қан орталығы» ғимаратына дейінгі аралықты салтанатты шерумен жүріп өтті. Сырттан көрген әр жанға бұл игілікті іс үлгі болары сөзсіз.
Алдымен тіркеу бөлімінен өтіп, зертханалық кабинетте талдама жасалынды, содан соң барып қыз-жігіттер қан тапсырып қайырымды іс қылды.
Орталық басшысы Гулам Умаров қайырымдылық іске белсене араласқан жастардың ізгі ниеттеріне өз ризашылығын білдіріп, осынау шара дәстүрлі ұйымдастырылса деген тілегін жеткізді.
Сонымен қатар облыстық «Жаңғыру жолы» республикалық жастар қозғалысының өңірлік штабы жастарының жетекшісі Хамида Турдыева: «Қайырымдылық акциясына барлығы 70 жас қатысып белсенділік танытты. «Өмір сыйла» қайырымдылық акциясы алдағы уақытта да өз жалғасын табады және оған қатысуға ниеттілердің саны күн санап артып келеді»-деді.
Шара соңында акцияға қатысушылар мекеме қызметкерлерімен естелік суретке түсіп, көтеріңкі көңілмен тарқасты.
Назерке Оңғар,
Облыс әкімі аппаратының
«Қоғамдық келісім» КММ
баспасөз қызметі
