ЖАМБЫЛ ОБЛЫСЫ ӨЗЕНДЕРІНДЕ СУ ДЕҢГЕЙІ ТҰРАҚТЫ, СУ ТАСҚЫНЫ ҚАУПІ БАЙҚАЛМАЙДЫ — ТАЛҒАТ АЙТБАЕВ
«Қазгидромет» РМК мәліметінше, Жамбыл облысы аумағында ауарайы жағдайына жүргізілген көп жылғы мониторинг деректеріне сәйкес қалалар мен елді мекендерде қар жамылғысы сыни деңгейден аспайды. Қазіргі уақытта өңірдегі өзендерде су деңгейі тұрақты, су тасқыны қаупі байқалмайды.
Бұл туралы ӨКҚ баспасөз брифингінде аймақтағы ТЖД Төтенше жағдайларды алдын алу басқармасының басшысы Талғат Айтбаев айтты. Оның сөзіне қарағанда, көктемгі уақытта нөсер жауын-шашынның түсуін және басқа да жағдайларды ескере отырып, су тасқыны қаупінің алдын алу мақсатында былтырғы қазан айынан бері каналдар, дренажды каналдар, арық желілері және су өткізу құрылыстары тазартылып жатыр.
«Қазіргі таңда 40 су бұру каналы, ұзындығы 423,8 шақырым 60 суару каналы, ұзындығы 158,4 шақырым 31 арық желісі, республикалық және облыстық маңызы бар 212 автожол көпірі және 45 теміржол көпірі, су өткізу құбырлары қоқыстан арылған. 11 ақпан күні су тасқыны қатерлерінің алдын алу мен оларды жою жөніндегі 2021-2023 жылдарға арналған шаралар кешені Жол картасының орындалуы және көктемгі су тасқыны кезеңіне дайындық барысы төтенше жағдайлардың алдын алу және жою жөніндегі комиссия отырысында қаралып, Тараз қаласы мен аудан әкімдеріне, мекеме, кәсіпорын басшыларына тапсырма берілді. Биыл бюджеттен шұғыл шығындарға арналған резервке — 587 млн 965 мың теңге, ТЖ арналған резерв бойынша 434 млн 479 мың теңге бөлінді», — деді Талғат Шакенұлы.
Ол 72 млн. теңге қаражатқа 10 044 м3 инертті материалдар, 392 тонна жанар-жағармай және 30 050 қап сатып алынғанын да атап өтті. Сонымен қатар 41 қабылдау пункті, 12 шатыр, 1968 төсек-орын және 468 кереует дайындалған.Өңірлік коммуникациялар қызметі
