Осы жексенбі Көлік және коммуникация қызметкерлері күніне орай бүгін Жамбыл облысындағы 100-ден астам теміржолшы марапатталды. Олардың қатарында үздік мамандар мен сала ардагерлері де бар.![]()
Ал, «Құрметті теміржолшы» атағын алғандардың басым бөлігі қарапайым еңбек адамдары. Салтанатты шараға күн, түн демей темір жол бойында тер төгіп жүрген кезекшіден бастап, пойыз құрастырушылар да шақырылған. Оларды Жамбыл обысы әкімінің орынбасары Қанатбек Мәдібек құттықтап, марапаттады. 
Жалпы Жамбыл облысының темір жол саласын дамытуда алар орны айрықша. Мәселен биыл жыл басынан бері аймақ шойын жолдары арқылы 13 млн тоннадан астам жүк тасымалданған. Ал осы уақытта отандық пойыздар өңірдегі 400 мыңнан астам жолаушыға қызмет көрсетті. Бүгінде облыстың барлық ауданында 8 мың теміржолшы еңбек етеді.
«Пойыздарды құрастырушы қызметінде 25 жыл болды. Сол 25 жасымда келгенмін, биыл 50-ге келдім. Біздің жұмыс өте қауіпті, күрделі, ең қиын жұмыс. Сол 25 жылда осындай марапатқа ие болып отырмыз. Еңбегімізді елеп, «Құрметті теміржолшы» медалін беріп жатқанына алғыс айтамын» – деді «Қазақстан темір жолы» ҰК АҚ Шу станциясының пойыз құрастырушысы Қуат Әжібаев. 
Айта кетейік, елімізде 2029 жылға дейін теміржол желілерінің 11 мың шақырымы жөнделеді. Биыл 3 мың шақырымнан астамы жаңғыртылып жатыр.
Қуаныш Арыстанбек — jambylmedia.kz
