Жамбыл облысы Жуалы ауданында келін енесінің атына заңсыз несие рәсімдегені үшін сотталды.
Сот мәліметінше, 2025 жылдың қарашасында сотталушы өз атына несие ала алмаған соң, белгісіз адамның көмегімен қайын енесінің келісімі бар екеніне сендіріп, оның атына онлайн несие рәсімдеген. Ол енесінің телефонын пайдаланып, растау кодын енгізіп, алдап бет-әлпетті сәйкестендіруден өткен.
Нәтижесінде 1,5 млн теңге көлемінде несие рәсімделіп, оның 1,1 млн теңгесі жәбірленушінің шотына түскен. Сотталушы бұл қаражатты өз есепшотына аударып, жеке қажеттілігіне жұмсаған. Жәбірленуші несие туралы тек ай сайынғы төлем шыққан кезде ғана білген.
Сотта айыпталушы кінәсін толық мойындап, өкініш білдірген.
Сот үкімімен ол Қылмыстық кодекстің 190-бабы 1-бөлігі бойынша кінәлі деп танылып, 1 жыл бас бостандығын шектеу жазасына кесілді. Сондай-ақ, жәбірленушіге келтірілген 1,5 млн теңге көлеміндегі шығын толық өтелетін болды.
Үкім заңды күшіне енді.
