ЖАМБЫЛДА ЖАЛҒА АЛЫНҒАН ПӘТЕРДІ СУБСИДИЯЛАУҒА 2 880,7 МЛН. ТЕҢГЕ БӨЛІНДІ
Мемлекет басшысының елдегі қалыптасқан әлеуметтік-экономикалық жағдайды тұрақтандыру мақсатындағы тапсырмасына сәйкес, жеке тұрғын үй қорынан жалға алынған тұрғынжай үшін азаматтардың жекелеген санаттарына төлемдер тағайындау және жүзеге асыру жоспарланып, тұрғын үй жалдау ақысының бір бөлігін төлеу бойынша қаржы операторы «Отбасы банк» АҚ тағайындалған. Төлемдер мемлекеттік бюджеттің қаражаты есебінен 50% және алушылардың есебінен 50 % тепе-теңдік негізде жүзеге асырылады. Көп балалы отбасылар, 1 және 2-топтағы мүгедектер, жетім балалар, мүгедектігі бар бала тәрбиелеп отырған отбасылар жалдау ақысын субсидиялауға өтініш тапсыра алады.
Бұл туралы ӨКҚ баспасөз алаңында Жамбыл облысы әкімдігі энергетика және тұрғын үй-коммуналдық шаруашылық басқармасы басшысының орынбасары Руслан Мұздыбеков айтты. Оның айтуынша, жоғарыда көрсетілген санаттағы азаматтарға субсидия алу үшін қойылатын талаптар мынадай: ел азаматы болу керек; Отбасының соңғы 6 айда әрбір мүшесіне шаққандағы ең төмен күнкөріс деңгейінің 1 еселенген шамасынан аспайтын жиынтық табысының болуы шарт; Тұрғын үйге мұқтаж тұлға ретінде тіркеу және тұрғын үйге мұқтаж тұлға мәртебесін растауы міндетті; Тұрғын үйдің меншік иесі мен жалға алушы арасында жасалған, сондай-ақ құқықтық кадастрда тіркелген шарттың болуы қажет.
«Жамбыл облысы бойынша бір шаршы метр үшін жалға алу құны 1370 теңге болып отыр. Биылға республикалық бюджеттен 2 880,7 млн теңге қаралған, ал қалған 20% жергілікті бюджеттен қарастырылады, яғни 576,1 млн. теңге. Қаржы операторы «Отбасы банк» АҚ-ның облыстық филиалында жоғарыдағы санаттарға жататын 5 800 адамның тізімі бойынша жұмыстар жүргізілуде. Басқарма тарапынан қаржы қарастыруға экономика және бюджетті жоспарлау басқармасына бюджеттік өтінім жолданды», — деді спикер.
