Жамбылдық полицейлер «Синтетикалық есірткінің зияны туралы» тақырыбында дөңгелек үстел өткізді

Тараз сервис және технологиялар колледжінде «Синтетикалық есірткінің зияны туралы» тақырыбында дөңгелек үстел өтті.

Іс-шараны Жамбыл облысының Полиция департаменті Есірткі қылмысына қарсы іс-қимыл басқармасының қызметкерлері Тараз қаласы әкімдігінің  ішкі саясат бөлімінің «Жастар ресурстық орталығы» коммуналдық мемлекеттік мекемесі, «ZHANUYA» емханасы қызметкерлерімен, сондай-ақ еріктілермен бірлесіп өткізді.

Профилактикалық әңгімелесу барысында мемлекеттік және орыс тілдерінде бейнематериалдар көрсетілді. Студенттерге есірткі саудагерлерінің көпшілігі интернет кеңістігін жиі пайдаланатыны турасында түсіндірме жұмыстары жүргізілді. Оларға күдікті сайттарға кіріп, интернетте бейтаныс адамдармен хат алмасудың қажет еместігі туралы да ескертілді. Сондай-ақ, жасөспірімдерге есірткіні қолдану мен таратқаны үшін қылмыстық жауапкершілік қарастырылатыны жөнінде  айтылды.

⁃ Барлығымыз  күш біріктіріп, жастарымызды болашағына балта шабатын  күмәнді әрекеттерден сақтауымыз қажет.Тыйым салынған заттар адам денсаулығына  зиян келтіреді. Өмірлік тәжірибенің болмауына байланысты жастар есірткі саудагерлерінің тұзағына қалай түскенін өздері байқамайды. Өкінішке орай, есірткіге тәуелділікті жеңуге болады. Сондықтан жастар арасында алдын алу жұмыстарын жүйелі түрде жүргізу маңызды, — деп атап көрсетті Жамбыл облысының Полиция департаменті Есірткі қылмысына қарсы іс-қимыл басқармасының бастығы полиция полковнигі Асқар Жұмабеков