Аймақта білім саласындағы көрсеткіштер жыл санап жақсарып келеді. Бұл білім беру ісіндегі оң жұмыстың жемісі. Жағымды өзгерісті оқушылардың білім сапасынан да аңғаруға болады. Мәселен, биыл Ұлттық бірыңғай тестілеу нәтижесі орташа 90,7 балл құрады, бұл 2018 жылға қарағанда 1,3 балға жоғары. Яғни 2018 жылы көрсеткіш 89,4баллды құраған болатын, – деп хабарлайды «shanyraqinfo.kz» ақпарат агенттігі.
Жоғарыда айтқанымыздай, саладағы ахуалдың жақсаруы оқушылардың білім деңгейінің жоғарылауына үлкен септігін тигізіп отыр. Нәтижесінде, жамбылдық өрендер жыл сайын білім бәйгелерінде озық шығып, үздік нәтижелер көрсетуде.
Жуырда облысымыздың озат оқушылары рухани жаңғыруды ауылдан бастауды мақсат еткен пилоттық жоба «IQanat» қоғамдық қоры ұсынған білімділер додасында оқ бойы озып шығып, үздік атанды. Қазақстандық кәсіпкерлердің бастамасымен қолға алынған «IQanat» олимпиадасы ауыл мектептерінде білім алып жатқан балаларға еліміздің ғана емес, шетелдік жоғары оқу орындарында білім алуларына жол ашуға бағытталған.
Олимпиадаға қатысушылар физика, математика және ағылшын тілінен сынақ тапсырады. Белгілі бір тақырыпта эссе жазады. Жеңімпаздарға жоғары оқу орындарына түсуде үлкен жеңілдіктер қарастырылған. Оған қоса, білімді оқушылармен екі жыл бойы біліктілігі жоғары ұстаздар жұмыс істейді. Түлектерді ұлттық бірыңғай тестілеуге және IELTS емтихандарына тегін даярлайды. Жалпы, қай жағынан алып қарасақ та олимпиаданың берері мол.
Ізденісте жүрген оқушыларды жаңашылдықтар мен жетістіктерге жетелейтін, бағы мен бабын қатар сынға салатын, білімін одан әрі шыңдауга бастайтын «ІQanat» додасына еліміздің түкпір-түкпірінен жиналған кіл жүйріктермен бірге өңіріміздің оқушылары да қатысты. Олардың қатарында облыс орталығынан шалғай орналасқан Шу ауданының білімділері де бар. Жүлдемен оралуға дәмеленіп, өңірдің абыройын арқалаған бірқатар жерлестеріміз аталмыш додада өздерін жақсы қырынан таныта білді.
Нәтижесінде, дәл елорда күні мерекесі қарсаңында ауданның абыройын асқақтатып, ұстаздарының үкілеген үмітін ақтап, мектебінің мақтанышына айналған оқушылар туған жеріне жеңіспен оралды. Нақтырақ айтсақ, ағылшын тілі пәнінен Е. Бекмаханов атындағы орта мектептің оқушысы Інжу Ақботаева бірінші орынды қанжығасына байласа, Жамбыл атындағы мектеп-гимназниясының оқушысы Ерасыл Қайратұлы мен Ш. Уәлиханов атындағы орта мектептің оқушысы Інжу Мұқатай Бурабайда ашылатын «IQanat Kazakh-English High School» мектебіне грант ұтып алды. Сондай-ақ, эссе жазуда қатарынан оза шапқан Ж.Баласағұн атындагы орта мектептің оқушысы Әмина Өнербай да жүлдемен оралды. Осылайша өңіріміздің оқушылары мектеп қабырғасында алған білімдерін үлкен додаларда кәдеге жаратып, алдыңғы қатардан көрінді. Жүлделі орынға ие болған жерлестерімізді аудан тұрғындары үлкен қошеметпен қарсы алып, жеңімпаздарға құрмет көрсетті.
