Жамбылдықтар жалпыреспубликалық сипат алған #Birge #TazaQazaqstan экологиялық акциясына белсенді түрде қатысты, – деп хабарлайды «shanyraqinfo.kz» ақпарат агенттігі.
Естеріңізде болса, бір жұма бұрын Экология, геология және табиғи ресурстар министрі Мағзұм Мырзағалиевтің бастамасынан бастау алған акцияның негізгі мақсаты су айдындарын күл қоқыстан тазарту болып табылады. Аталмыш акция жарияланған алғашқы күні ҚР Премьер-Министрі Асқар Мамин бастаған Үкімет мүшелері мен елорда тұрғындары Нұр- Сұлтан қаласы маңындағы Қоянды су қоймасының аумағын тазартты. 1000-ға жуық адам қатысқан экосенбілікте 10 тонна қоқыс жиналды. Күні кеше Мемлекет басшысы Қасым-Жомарт Тоқаев та бұл экочелленджді қолдайтынын жеткізді.
Өз кезегінде жамбылдықтар да экосенбіліктен қалыс қалмай өңірдегі барлық жағажайларда тазалық жұмыстарына кірісті.Сенбілік облыс орталығы Тараз қаласының аумағындағы «Қарасу – 1», «Қарасу — 2», «Түйте», «Төрегелді», «Базарбай», «Үшбұлақ», «Сеңкібай», «Оңтүстік құрғату дренажды» каналдары, «Тайвань» дренажды каналардың бойы, «Талас» өзені және «Ақбұлақ», «Қаратау» мөлтек аудандарындағы каналдардың жағажайларында жүргізілуде. Шараға облыс әкімінің міндетін атқарушы Нұржан Календеров бастаған облыс әкімі аппаратының және бірқатар мемлекеттік мекемелердің, өнеркәсіп орындарының қызметкерлері мен түрлі сала мамандары қамтылған. Жалпы республикалық сенбілікте сөйлеген алғы сөзінде Нұржан Сәбитұлы бұл шараның маңыздылығын атап өтіп, көпшілікті жағажайлар мен су айдындарының тазалығына баса назар аударуға шақырды. Атап өту керек өңірде 21 нысанда жүргізілген сенбілікке 30-ға жуық техника жұмылдырылды.
Облыс бойынша 10 мыңға жуық адам ат салысқан іс шараның нәтижесінде шамамен 20 тоннадай қоқыс жиналған.
Айта кеткен ләзім, алдағы уақытта Қазақстан мектептері мен балабақшаларында экологиялық тәрбиеге арналған қосымша сабақ енгізілмек. Экология, геология және табиғи ресурстар министрлігі Білім және ғылым министрлігімен бірлесе отырып, барлық мектеп пен балабақшада экологиялық сағат енгізуді жоспарлап отыр. Еліміздің бас экологы М.Мырзағалиевтің айтуынша, тазалық ұғымын санаға бала жастан бастап сіңіру керек.
