Пандемияға орай екі жыл қатарынан тойланбаған Наурыз мерекесі биыл ел көлемінде кеңінен аталып өтті ғой. Таласта да тамаша болды. Киіз үйлер тігіліп, алтыбақан құрылып, асық атылып, балуандар белдесіп дегендей.
Ұлыстың Ұлы күнінде аудан әкімі Қанатбек Мәдібек ауданның қара шаңырағы Ақкөлдегі наурыз тойын көруге барады. Мереке салтанаттарын қызықтаған соң наурыз көжеден дәм татпақ болып қариялар киіз үйге кіреді. Ақсақалдардың соңын алып аудан басшысы да табалдырықтан аттайды. Қанатбек Қайшыбекұлы әдеттегісінше төрге озбай, үстелдің төменгі жағына жайғаса салады. Қасында отырған қария Қанекеңе бір қарапты да:
—Қай баласың?,-депті.
—Осы ауылдың баласымын,-дейді.
Аздан соң әлгі ақсақал тағы бұрылып:
—Жандостың (ауыл әкімі) ағасысың ба?- деп сұрайды.
—Ия, Жандостың ағасымын,-дейді.
—Сонда Жандостың қандай ағасысың?-демейме қария.
Сөйтсе Қанекең:
—Ақсақал, Жандостың үлкен ағасы болам. Мен аудан әкімімін, Жандос ауылы әкімі,-дегенде қария сасқанынан ішіп отырған көжесіне күйіп қала жаздапты.
Бекнұр Сатыбалдиев, Талас ауданы
