Жолдау — Қазақстан халқы асыға күтетін ауқымды мәселелердің шешімі. Оның өн бойында өткеніміз өлшеніп, бүгініміз бағамдалып, болашағымыз жайлы болжамдар айтылып, тапсырмалар жүктеледі. Биылғы күздің бірінші күні Қазақстан Республикасының Президенті Қасым-Жомарт Кемелұлы Тоқаев «Халық бірлігі және жүйелі реформалар — ел өркендеуінің берік негізі» атты Жолдауын жариялады. Жоғарыда атап өткендей бұл құжаттың бәсі жоғары, салмағы ауыр.
Межелі міндеттер қаузалған Жолдаумен таныса отырып, терең ойға шомдым. Өткен жылы өкпемізден қысқан дерт жақындарымыздан жырақтатып, экономикамызға өз әсерін тигізбей қоймады. Бірінші байлықтың шын байлық екенін ұғындырды. Бұл тұрғыда Мемлекет басшысы бірқатар мәселелерге тоқталып, атқарылуы тиіс ауқымды жұмыстың ауанын белгілеп берді. Халық — уық, хан — шаңырақ деген. Бұған да бірлік керек, біріккен тірлік керек.
Жердің де халқымыздың жаны екенін білдірді. Сол секілді судың да сұрауы бар деген сөздің түп-төркініне бір сәт үңілу қажет екенін айтты.
-Алдағы уақытта су тапшылығы болу қаупі бар. Ол болжамды Біріккен Ұлттар Ұйымы жасап, алдағы он
жыл ішінде су ресурсының тапшылығы болып қалады деп отыр. 2030 жылға қарай су тапшылығының көлемі 40 пайызға жетуі мүмкін,-деді Мемлекет басшысы.
Оның дауасы — үнем. Әсіресе тың технология мен цифрландыру үрдісін енгізе отырып, суды үнемдеу керекпіз. Тапшылықты жоюдың өзге жолы жоқ. Расында, оның шешімі экожүйені сақтай отырып, оны пайдалану үшінаса маңызды деген 120 каналды қайта жаңғыртуға кірісу. Ақмола, Алматы, Батыс Қазақстан, Жамбыл, Қызылорда, Түркістан облыстарында жаңа 9 су қоймасы салынады. Жолдау мәтініндегі осы жолдарды оқып, қуанып қалдық. Жылдар бойы ауқымды қаржы бөлінгенімен, ауыз су мәселесі мәселе күйінде қалып отырғаны анық.
Ал, Президенттің Өңірлерді дамыту ұлттық жобасы аясында бес жыл ішінде елді 100 пайыз ауыз сумен қамтамасыз етуді тапсыруы өте орынды деп санаймыз. Тек бақылауы күшті болуы керек. Бұл міндетті
орындау Үкіметке жүктелді.
Су — тіршілік көзі. Оны аста-төк пайдаланып, ысырап етіп жатқанымыз анық. Бір күні баршамызға арман болмас үшін оны үнемдейік. Егінімізді жаңа технологиялармен өсіріп, үнемдеудің кілтін табалық. Ал, ауыз су мәселесі толық шешілуі үшін Президент тапсырған тапсырманы жергілікті әкімдік тиянақты
орындап, аға буынның ақылына жүгінуі қажет. Бақылау бар жерде, бей-берекет болмайды. Жолдауды осылайша жүзеге асырып, ел болып үлес қосайық.
