Қазіргі заман гуманитарлық-техникалық колледжінде «Заң мен тәртіп» жобасы аясында «Барыңды бағала» атты студенттермен кездесу өтті. Іс-шара жастардың құқықтық мәдениетін арттыру, заң талаптарын сақтау, қоғамдық тәртіпке жауапкершілікпен қарау және тарихи-рухани құндылықтарды бағалауға бағытталды.
Кездесу «Қоғамдық келісім» КММ басшысы Мүбарак Жинақбаеваның модераторлығымен өтті. Жиында ҚХА Аналар кеңесінің төрайымы Эльмира Мырза-ғали, «Тарихи-мәдени ескерткіштерді қорғау дирекциясы» КММ басшысы Сауран Қалиев, ювеналды полиция өкілі Азат Пирматов және Аналар кеңесі төрайымының орынбасары Сара Даузова баяндама жасап, жастардың құқықтық жауапкершілігі, тарихи мұраны қорғау және салауатты өмір салтының маңызын түсіндірді.
Колледж директоры Фарида Нақыш жастардың құқықтық сауаттылығын арттыру білім беру ұйымдарының басты міндеті екенін атап өтті. Іс-шара соңында белсенді студенттер марапатталып, «Қазақ елі» әні орындалып, естелік суретке түсумен қорытындыланды.
