Бүгін 9 шілде күні Жамбыл облысының Берікқара жазғы лагерінде демалып жатқан «Арнаулы әлеуметтік қызметтерге мұқтаж балаларды қолдау орталығы» мекемесінің және Сарысу, Талас аудандарының балаларымен «Жастарды құқықтық тәрбиелеу – сыбайлас жемқорлыққа қарсы дүниетанымның негізі» атты тақырыбы бойынша тағылымды кездесу өтті.
Негізгі тақырып бойынша және балалардың құқы мен қауіпсіздігі, заң мен тәртіп қағидаты, мемлекеттің балаларға жасап жатқан қамқорлығы жәйлі балалар алдында «ЖАҢАРУ» сыбайлас жемқорлыққа қарсы жалпыұлттық қозғалыс» РҚБ Жамбыл облыстық филиалының директоры Қасымхан Естемесұлы Төлендиев дәріс беріп, еліміздің келешегі – жастарды өз баласындай жақсы қарап, тәрбиелеп жатқан лагерь директоры Сания Теппееваға және Балаларды қолдау орталығының басшысы Жанат Жапаровқа Рахметін айтты.
Жасөспірімдердің қауіпсіздігі, қоғамдағы тәртібі мен заң алдындағы жауапкершілігі туралы Жуалы аудандық кәмелетке толмаған жасөспірімдердің учаскелік полиция инспекторы, полиция лейтенанты Аят Қылышбаев пен аудандық полиция бөлімінің ювеналдық полиция тобының инспекторы, полиция аға лейтенанты Абдрахман Жалғасбай, патриотизм мен еңбекқорлық, отаншылдық пен әділеттілік, отбасы және ұлттық құндылықтар туралы облыстық ардагерлер кеңесінің мәдениет және жастар ісі жөніндегі төралқаның орынбасары, «Желтоқсан-86» ҚБ төрағасының орынбасары Исмаил Хаджимуратов және білім мен тәрбиенің маңыздылығы, салауатты өмір салтын ұстану, жастарды жастайынан спортқа баулу, адалдыққа, адамгершілікке тәрбиелеу туралы Тараз қалалық мәслихаттың депутаты, облыстық қоғамдық кеңестің мүшесі, «Жекпе Жек» кәсіпқой спорт клубының басшысы Елдос Далабай әңгімеледі, ол сонымен қатар, кішкентай жеткіншектердің тәрбиешілерінің мейірімділігіне ризашылығын білдірді.
Балалармен пікір алмасу, сұрақ-жауап бөлімі де қызық өтті. Балалар лагердегі демалыстарының жақсы, қызықты өтіп жатқанын айтты, модератордың қойған:
Еліміз қай жылы Тәуелсіздік алды?
Ата Заңымыз – Конституция қай жылы, қай айдың, қай күні қабылданды? Биыл қанша жылдығы?
Қазақстанның Мемлекеттік рәміздер күні қай күн? деген, басқа да сұрақтарына таласып жауап берді.![]()
Жиынды қорытындылаған «Арнаулы әлеуметтік қызметтерге мұқтаж балаларды қолдау орталығы» мекемесі директорының міндетін уақытша атқарушы Жанат Жапаров кездесуге қатысқан қонақтарға жылы сөздері мен мотивациялық тағылымы мол әңгімелері үшін алғысын айтты.
Кездесуді бәріміз Қазақстанның Әнұранын орындаумен аяқтап, естелікке суретке түстік.
