Меркі ауданының Жастар ресурстық орталығының ұйымдастыруымен тау аумағында «Жасыл тау Меркі» тазалық акциясы өтті. Экологиялық акцияны аудан әкімі Мейірхан Өмірбек бастап, оған аудан әкімдігі, ауылдық округ аппараты қызметкерлері, этно-мәдени орталықтар мүшелері, ерікті азаматтар қатысты.
Еріктілер жылының 7 бағытына жоспарлы түрде өткен бұл акция «Таза әлем» бағытын іске асыру бойынша атқарылды. Меркі ауданы еріктілердің атқарған жұмыстары бойынша 2019 жылы облыс көлемінде көзге түсіп үлгерген-ді. Міне, биылғы жылы да өз үлестерін қосып, белсене атсалысып келеді. Аудан әкімі акцияның ашылу салтанатында ерікті ол тек жас емес, кез-келген көмек қолын созуға, қайырымдылық жасауға, оңды іс атқаруға ниетті азамат екенін атап өтті.
Бұл акция «Алғыс күні» де іске асырылған болатын. «Қамқор» бағыты бойынша аудан жастары 8 отбасына азық- түлік, 4 отбасына сыртқы тазалық жұмыстарына көмек берілсе, екі жалғызбасты әжеге үйдің ішкі және сыртқы тазалық, жиын жұмыстары жасалып берілген-ді.
«Жасыл Тау Меркі» акциясы барысында «Жұлдыз» балаларды сауықтыру лагеріне апаратын жол бойы мен «Меркі шипажайынан» үңгірге дейін жол бойы күл-қоқыстардан тазартылды. Жалпы акцияға 150-ге жуық ерікті, бірнеше техника тартылып, 25 тонна қоқыс шығарылды.
Аудан аумағында көктемгі тазалық, абаттандыру жұмыстары да қарқынды жүруде. Еріктілер жылында ауданның барлық тұрғыны осы сынды іс-шараларға жыл бойы белсенді араласады деген сенімдеміз.
Ляззат Серікбай,
Еркін Жасыбаев
Меркі ауданы
