Тоқаев Ұлы Жеңістің 80 жылдығын тойлау 2025 жылы мемлекет күн тәртібінде тұрған маңызды күн екенін айтты.

«Біздің аталарымыз бен әкелеріміз барлық майданда жанқияр­лықпен соғысты. Оның үстіне, Қазақстан әскерді қару-жарақпен, өнеркәсіп өнімдерімен және азық-түлікпен қамтамасыз ету ісінде маңызды рөл атқарған сенімді тыл болды», – деді мемлекет басшысы.

Ол Атырауда өткен Ұлттық Құрылтай отырысында Жеңіс мерейтойына дайындық жүргізу керегін айтқанын жеткізді.

• Ұлы Отан соғысы ардагерлеріне берілетін төлемақы 5 миллион теңгеге өседі

• Ұлы Отан соғысы батырларының есімін қанша қазақстандық алған – Ұлттық статистика бюросы

“Жеңісті мерекелеуге арнал­ған жоспарда көптеген іс-шара қам­тыл­ған. Оның ең бастысы – Астанада өтетін әскери шеру. Соғыс және тыл ардагерлеріне құрмет көрсетіледі, ешкім де елеусіз қалмайды. Концерттер мен көрмелер өтеді, деректі фильмдер мен бағдарламалар түсіріледі, тарихи кітаптар мен фотоальбомдар шығарылады. Жауынгерлеріміздің есімін ел жадында сақтау үшін зерттеу жұмыс­тары жалғаса береді. Б.Момышұлының – 115, М.Ғабдуллиннің – 110, Ә.Молдағұлованың 100 жылдығы салтанатты іс-шаралар тізіміне кіреді», – деді Тоқаев.

Тоқаев соғыста қаза тапқандарды ұмытпай, қаһарман ерлеріміздің рухына тағзым ету, ел ішінде бейбітшілік пен тыныштықты сақтау – баршаға ортақ парызымыз, дейді.

Айта кетейік, Қазақстанда 2020 жылдан бері әскери шерулер өткізілмеген.

Еске салайық, бұған дейін Ресей президенті Путин 2025 жылы Тәуелсіз мемлекеттер достастығы (ТМД) елдері Ұлы Отан соғысындағы жеңістің 80 жылдығын бірлесіп тойлайтынын айтқан еді.

фото:depositphotos