| Биылғы жаз жылдағыға қарағанда өте ыстық болып тұр. Ауа райын болжаушылардың айтуына қарағанда жаз қандай ыстық болса, керісінше қыс сондай суық болады екен. Демек, алдағы қыс қылышын сүйретіп, қатал болып кіруі бек мүмкін. Сондықтанда қыс мерзіміне қазірден бастап ерекше дайындық қажет.
Мұны жете түсінген шаруалар ерте көктемнен бастап дайындық жұмыстарын бастапта кеткен. Дәлірек айтқанда аудан әкімдігі ауыл шаруашылығы бөлімінің 17 тамыз күнгі мәліметі бойынша аудандағы 24972 гектар жоңышқа алқабы екі мәрте орылып алынды. Сондай-ақ 5051 гектар жердегі табиғи шөпте түгелдей жиналды. Сөйтіп, аудан бойынша жоспардағы 176300 тоннаның орнына 203716 тонна пішен дайындалып, жоспар артығымен орындалды. Алдағы уақытта жоңышқаның үшінші орымы мен 350 гектар сүрлемдік жүгеріні қоссақ жемшөп қоры тағыда көбейе түспек. Жекелеген округтер арасында Көктал, Сазтерек, Темірбек, Мырзатай, Көптерек ауылдық округтері жемшөп дайындаудағы жоспарларын 123-132 пайыз аралығында орындап, өзгелерге үлгі көрсетті. Аудан бойынша биылғы жылы картоп-700, көкөніс — 5704, майлы дақылдар -1400, бақша дақылдары — 1800 гектарға егілген еді. Осы аптаға дейін картоптың — 621, көкөністің — 2873, майлы дақылдардың — 50, бақша дақылдарының -1777 гектары жиналып, одан 14655 т картоп, 85158 тонна көкөніс, 350 т майлы, 51078 тонна бақша дақылдары жиналды. Жекелеген округтер арасында Қостөбе, Сарыкемер, Үлгілі ауылдық округтері картоп, Жалғызтөбе, Қызыл жұлдыз, Сарыкемер ауылдық округтері көкөніс жинауды толық аяқтаса, бақша дақылдарын 11 ауылдық округ диқандары толықтай жинап үлгерген. Басқа ауылдық округтерде де картоп, көкөніс, бақша дақылдарын жинау жұмыстары ұйымшылдықпен жүргізілуде. |
