Күні кеше ауданымыздың «Құрметті азаматы», көпке сыйлы Шымшық Мадалиеваны қабылдап, құрмет көрсеттік. Бүгінде жергілікті жұртшылыққа атымтай жомарттығымен танымал болған Шымшық анамыз бірнеше отбасының баспаналы болуына тікелей себепші болған.
Әрдайым игі істердің басы-қасында жүретін жерлесіміз көмек сұрап келген кез келген адамға қолұшын созудан ешқашан тартынып қалған емес. Дәл осындай мәрттігі үшін Ш.Мадалиеваның есімі жуырда ғана «100 ҰЛТ ЖАНАШЫРЫ» атты кітапқа енсе, артынша Халық қаhарманы Бауыржан Момышұлы атындағы «Намыс» төсбелгісімен марапатталды.
Сексеннің сеңгіріне шыққан анамызбен емен-жарқын әңгіме барысында бойынан ұлттық рухтың, қазақылықтың қайнары төгіліп тұрғанын аңғардым. Содан болар, Шымшық анамызды жерлестері ауылдың «Жеті қазынасына» теңейтіні. Әсерлі әңгімеден кейін жерлесімізге «Құрмет грамотасын” тапсырып, қазақы дәстүрмен иығына ақ жаулығы мен қамзолын жаптық. Дәл осындай өнегелі аналардың қай-қайсысын болса да қалтарыста қалдырмай, құрмет көрсете білу — біздің перзенттік парызымыз.
Сәкен Арубаев, Шу ауданының әкімі
