Таразда кәмелетке толмағандардың істері және олардың құқықтарын қорғау жөніндегі комиссияның жұмысы және оқушылардың жазғы демалысын тиімді ұйымдастыру бойынша жиын өтті.
Ағымдағы жылдың 4 ай қорытындысы бойынша 10 комиссия отырысы өткізілді: 5 көшпелі, 4 кезекті, 1 кезектен тыс отырыс. Барлығы 68 кәмелетке толмаған балаларға қатысты мәселелер қаралып, 38 қаулы шығарылды.
Атап айтқанда ұзақ уақыт бойы сабаққа бармай, оқудан жалтарған және девиантты мінез-құлық әрекеттері үшін жасөспірімдерді арнаулы мектепке орналастыру туралы 8 оқушыға қатысты комиссияның тиісті қаулылары шығып, істері сотқа жолданды.
Ал, баланың тәрбиесі мен білім алуы бойынша ата-аналық міндеттерін орындамайтын 4 ата-анаға қатысты ата-ана құқығынан айыру және шектеу туралы қаулысы шығып, сотқа жолданды.
Ата-аналарының ықпалымен діни ағымдарға кірген оқушылар саны 49-дан 30-ға кеміген.Жыл басынан бері өз-өзіне қол жұмсаған оқушылар тіркелген жоқ. Күндізгі рейд жұмысы нәтижесінде 13 нысан бойынша 16 кәмелетке толмаған оқушылар заңсыз жұмыс істеп жатқандығы анықталып, тиісті шаралар қолданылды.
Қиын жағдайға тап болған балаларды анықтап, оларға қазіргі таңда қылмыстың алдын алу мақсатында «Бала бақылауда» жобасы аясында 566 оқушы тізімге алынып, жұмыс жүргізілуде. Жыл басынан бері кәмелетке толмағандар арасында 18 қылмыс тіркеліп, 25 % кеміген. Одан өзге «Қауіпсіз қала» жобасын одан әрі дамыту бойынша тиісті іс-ішаралар ұйымдастырылуда.
«Қылмыс саны азайғанмен жасөспірімдер арасындағы құқық бұзушылықтың белең алып отырғаны жасырын емес. Бұл мәселенің алдын-алуда ата-анамен қатар, жергілікті билік те жауапты. Қала маңында орналасқан елдімекендерге спорт залдарын, түрлі үйірмелері бар орталықтарды ашып, балалардың бос уақытын тиімді ұйымдастыру керек. Ал, ұлы мен қызының беймезгіл уақытта қайда жүргенінен бейхабар, жауапкершілік жүгін сезінбейтін ата-аналарды әкімшілік жазаға тарту керек», деген қала әкімі жауапты сала басщыларына нақты тапсырмалар берді.
Ал, қалада жазғы демалыс маусымында сауықтыру және ұйымдастыру шараларымен 67 422 баланы қамту жоспарланған. 47 195 оқушы жазғы сауықтыру және демалыс шараларымен, 20226 оқушы еңбек және демалыс шараларымен қамтылады.
Балалардың жазғы демалысы 2 бағытта жүргізіледі: 1-ші бағыт бойынша – 17680 бала мектеп жанындағы және қала сыртындағы сауықтыру лагерьлерінде демалады, 2-ші бағыт бойынша – балалардың демалысы мен бос уақыттарын ұйымдастыру шараларына 49742 оқушы қатысады. Сонымен қатар, қала сыртындағы лагерьлерде бір баланың күндік тамақтануына 5 мезгіл орташа есеппен 3250 теңге бөлінген. Тегін тамақтанатын мектеп жанындағы лагерьлерге бір балаға күніне 1 мезгіл орташа есеппен 450 теңге бөлінген.
