Мемлекет басшысы Қасым-Жомарт Тоқаевтың 1 қыркүйектегі Қазақстан халқына арнаған Жолдауы шыққалы оны халық арасында түсіндіру жұмыстары қарқынды жалғасуда. Соған байланысты өткен аптада облыс әкімінің орынбасары Мәдібек Қанатбек Қайшыбекұлы және облыс әкімдігінің ветеринария басқармасының басшысы Нұражас Құрмантаев, облыс әкімдігінің кәсіпкерлік және индустриалды-инновациялық дамыту басқарма басшысының орынбасары Бейбітбек Жайлыбаевтар Мемлекет басшысының «Әділетті мемлекет.Біртұтас ұлт. Берекелі қоғам» атты Жолдауын түсіндіру және үкіметтік емес ұйымдардың Президент Жолдауын іске асырудағы рөлі айқындау мақсатында аудан активімен кездесу өткізді.
Кездесуді аудан әкімі Әлихан Балқыбеков ашып, Мемлекет басшысының Жолдауда айтылған басым бағыттарына тоқталып, облыс әкімінің орынбасары Қанатбек Қайшыбекұлына сөз берді.
Өз кезегінде облыс әкімінің орынбасары Қ.Мәдібек Жолдау төңірегінде баян етілген негізгі тұжырымдамаларға тоқталып кетті.
— Ауылшаруашылық саласын дамыту үшін, ең алдымен оның дамуына кедергі келтіріп отырған проблемаларды анықтауға тиіспіз. Сол проблемаларды біртіндеп шеше бастасақ, мақсаттар өз-өзінен орындалады, яғни, шаруашылық өнімдері артып, азық-түлік қауіпсіздігі азаяды. Осы орайда, Мемлекет басшысының Жолдауы мәселелердің шешілу жолына негізделген, – деді.
Сонымен қатар, ауылшаруашылығын дамытуға арналған бағдаламалар жөнінде кеңінен түсіндірмелер берілді.
Жиынға қатысушылар өздерінің ұсыныс-сауалдарын жеткізіп, тиісінше жауаптарын алды.
