Елбасы Нұрсұлтан Әбішұлы Назарбаев өзінің «Ұлы даланың жеті қыры» атты мақаласында қазақтың кең байтақ даласын мекен еткен ежелгі көшпенді халқының жеті қырын атап көрсетті. Сол жеті қырлы алмастың алғашқысы – гауһардай жарқырап күллі көшпенділер дәуіріне, адамзат дамуына сәуле түсіріп тұрған атқа міну мәдениеті. Себебі, өзін көшпенділердің тікелей ұрпағымыз дейтін қазақ баласы үшін атқа мініп, ысқырып жылқы айдап, көпіршітіп қымыз сапырып, қиялай кесіп қазы жеуден артық бақыт болмас…
Осы атқа міну мәдениетінің ішінде жылқымен қатысты ұлттық ойындар, жүрегім қазақ деп соғатын әрбір азаматты тебірентпесі анық. Сондай ойындардың бірі әрі бірегейі – көкпар ойыны.
Көкпар – жаужүрек бабаларымыздан қалған асыл мұраларымыздың бірі, ұлттық құндылық. Әрі бұл рухы мықты жігіттердің ойыны десек те болады. Бұл — еліміздің елдігін, көңілдің кеңдігін, адамның ептілігін танытатын ойын. Әсілінде, көкпар десе арқасы қозбайтын қазақ кемде -кем. Ауыздығымен алысқан тұлпарға аяқ артып атшабар алаңында көк серкені тақымдап, делебең қозып шапқанға не жетсін, шіркін. Қазақ «Көкпар – батырдыкі, той – ақындыкі» деп бекер айтпаған.
Жуалы ауданы әкімінің кубогі үшін «ҰЛЫ ДАЛАНЫҢ ЖЕТІ ҚЫРЫ» атты жастар арасындағы көкпардан финалдық ойындар өткізілді. Жуалы ауданы «Жастар ресурстық орталығы» мекемесі және «Бұқаралық спорттық іс-шаралар өткізу орталығы» мекемесі ұйымдастырған жарыс жастар арасында салауатты өмір салтын ұстануға шақыра отырып дәстүрлі қазақ ат спортын дамыту мақсатында өткізілді.
Жігіттің білегі мен жүрегіндегі күші және ат баптаған қауымның бабы мен бағы сынға түскен жарыста Қошқарата, Күреңбел, Көкбастау және Ақсай ауылдық округ жастарынан құралған 4 команда аудан жеңімпазы атағын сарапқа салды.
Тұлпар мен шабандоздың, ептілік пен ержүректіктің біте қайнасқан айқын көрінісін тамашалаған Жуалы ауданы әкімінің орынбасары Ж. Шоғалов, «Бұқаралық спорттық іс-шаралар өткізу орталығы» мекемесінің директоры Ж. Баетов және аудандық мәслихат депутаты, «Жастар ресурстық орталығы» мекемесінің директоры М.Телеушов жарыс соңында командаларды жеңістерімен құттықтап, ынталандыру сыйлықтарымен қатар арнай дипломдар табыстап марапаттады.
Тартысты ойын нәтижесінде, І орынды Ақсай ауылдық округінің жастары иеленді. ІІ орынды Қошқарата ауылдық округінің жастары алса, ІІІ орынға Күреңбел ауылдық округінің жастары табан тіреді.
