Жуалы ауданының осы жылғы қаңтар мен маусым айларындағы әлеуметтік-экономикалық дамуы деңгейіне назар аударсақ, аталған өңірде біршама ілгерілеушілік бар, – деп хабарлайды «shanyraqinfo.kz» ақпарат агенттігі.
Аталған аудан әкімі Нарбай Ергебековтің айтуынша, аудан Қазақстан Республикасының тұңғыш Президенті Н.Ә.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында атап көрсетілген халық табысының өсуі, тұрмыс сапасын арттыру, өмір сүруге жайлы орта қалыптастыру, азаматтар сұранысына бейімделген мемлекеттік аппарат құру, тиімді сыртқы саясат және әрбір қазақстандықтың еліміздегі өзгерістер үдерістеріне атсалысуы секілді басымдықтарды негізге ала отырып жұмыс жүргізеді екен.
– Қазақстанның әр азаматының әл-ауқатын арттыруға бағытталған, қажетті шешімдерді қамтитын бұл Жолдау мемлекеттік органдар, бизнес пен қоғам үшін іс-қимылдың тұтас стратегиясын айқындайтын, өзінің мәні мен мазмұны жағынан ерекше құжат. Бұл жаңа әлеуметтік бастамалардың қоғамымыздың әлеуметтік бірлігін нығайтуға және әрбір қазақстандықтың әл-ауқатын ары қарай жақсарта түсуге бағытталғандығымен құнды.
Жалпы, Н.Ә.Назарбаев былтыр осы жылды «Жастар жылы» деп жариялаған болатын. соның арқасында аудандағы бүгінгі буын өкілдеріне де көрсетіліп жатқан қолдаулар айрықша, – дейді Нарбай Әбілқасымұлы.
Жалпы, елімізде жастар саясатын жүзеге асырудағы негізгі міндет ел болашағының ертеңіне қамқорлық жасау екені белгілі. Сол үшінде мемлекет жастар саясатын жетілдіруде тың бастамаларды қолға алып, жаңа жобаларды жүзеге асыруда. Сондықтан, қоғамның маңызды бір бөлігі саналатын жастардың қолтығынан демеп, оларды жұмыспен қамту басты назарға алынған.
– Осы проблеманы жою үшін елімізде «Дипломмен ауылға», «Бизнестің жол картасы», «Жұмыспен қамту-2020», «Әрбір отбасына «7-20-25» бағдарламасы аясында баспана алудың жаңа мүмкіндіктерін беру», «Жоғары білім алудың қолжетімділігі мен сапасын арттырып, студент жастардың жатақханадағы жағдайын жақсарту» секілді жүзеге асырылып жатқан шаруалар баршылық. Ал жалпы алғанда, аудан экономикасы еліміздің біртұтас экономикалық кеңістігінің құрамдас бөлшегі. Ауданның әлеуметтік-экономикалық көрсеткіштеріне жылдан-жылға артығымен қол жеткізудеміз, – дейді ол.
