Бүгін Т.Рысқұлов ауданының әкімі Ернар Есіркеповтің төрағалығымен өткен аппараттық кеңесте алдағы жылыту маусымына дайындық мәселелері талқыланды.
Аудан аумағындағы 170 әлеуметтік нысанның 147-сі газбен, 22-сі көмірмен, 1 нысан мазутпен жылытылады. Жоспарланған 2 815 тонна қатты отынға жалпы құны 74,9 млн теңгеге келісімшарттар жасалып, қазіргі таңда 825 тоннасы (29,3%) жеткізілді. Сонымен қатар, тұрғындарға қажетті 800 тонна көмір қорының 450 тоннасы жеткізілген. Қазіргі сатылым бағасы тоннасына 25-30 мың теңгені құрап отыр.
Аталған жұмыстар аудан әкімдігінің 2024 жылғы 27 мамырдағы №100 қаулысына сәйкес құрылған отын-энергетика кешені нысандарын жылыту маусымына дайындау жөніндегі аудандық комиссия бақылауында. Бүгінгі күнге дейін комиссияның төрт отырысы өтіп, нақты шаралар атқарылуда.
Сондай-ақ, кеңесте көгілдір отынды пайдалану барысында тұрғындар қауіпсіздігін сақтау және газ қондырғыларын техникалық тексерістен өткізу мәселелері сараланды.
Отырыста бұдан бөлек, азаматтарды жеке қабылдау қорытындылары қаралды. Аудан әкімі аппаратының басшысы Ернар Құралбаевтың мәліметінше, есепті кезеңде (8 ай) әкімнің төрағалығымен 27 қабылдау өткізіліп, 128 азаматтың өтініші тыңдалды. Оның ішінде 46 өтінішке түсінік беріліп, 57 тапсырма орындалды. 6 мәселе бақылауда тұр, ал 19 тапсырма тиісті мекемелер тарапынан орындалу үстінде.
Аудан басшысы тұрғындар өтініштерінің дер кезінде шешілуін қамтамасыз етіп, әрбір көтерілген мәселе бойынша жауапты сала басшыларының жұмысына нақты бақылау орнатуды тапсырды.
