Бөтен тойға кіріп, тамақтанып кеткен: Шақыртусыз қонақтар қазақстандықтардың ашуына тиді

Кейінгі кезде әлеуметтік желіде бөтен тойға, асқа шақырусыз барып, дастарқаннан дәм татып, тіпті сарқыт пен тойбастар алып кететіндер туралы оқиғалар жиі айтыла бастады. Алматыдағы қыз ұзатуда болған жағдай да мұндай жайттың алғашқысы емес. 

Алматыдағы мейрамханалардың бірінде өткен қыз ұзату тойында күтпеген жағдай болды. Той иелеріне мүлде қатысы жоқ екі қыз шетелдік азаматпен бірге банкетке кіріп, арнайы шақырылған қонақтардың орнына жайғасып алған.

Мұны Әсем Қайырбекова Threads желісінде жазды. Оның айтуынша, қыз ұзатуда бір адамға арналған орынның құны 55 мың теңге болған. Қонақтардың бәрі алдын ала тізімге енгізіліп, кімнің қай үстелде отыратынына дейін белгіленген. Тіпті мейрамхананың кіреберісіне арнайы қонақтар тізімі ілініпті.

Алайда той қызған кезде Әсемнің екі туысы келіп, өздеріне арналған орындардың бос емес екенін айтқан.

“Барлық қонақтың орны алдын ала белгіленген еді. Бірақ тойдың ортасында екі туысым келіп, олардың орындарына басқа адамдар отырып алғанын айтты”, – деп жазды ол.

Үстелде той иелеріне де, құдаларға да таныс емес екі әйел мен шетелдік ер адам отырған.

Тойдың берекесін қашырып, жұрттың көзінше шу шығарғысы келмеген үй иелері сол сәтте мәселені ушықтырмаған. Ал бөгде қонақтар өздерінің әшкере болғанын сезген соң көп ұзамай кетіп қалған.

Олардың кім екенін той иелері ертесіне анықтаған. Той үстелдерінде қонақтар суретке түсуі үшін арнайы QR-кодтар болған. Сол арқылы түсірілген барлық кадр келесі күні ортақ альбомға жүктелген.

Әсем альбомды ашқанда, шақырусыз келген екі әйелдің суреттерін көрген.

“Таңертең ортақ альбомды ашсақ, әлгі екі әйел сол жерде отыр. Біздің дастарқаннан ас ішіп, суретке түсіп, емін-еркін көңіл көтерген”, – дейді ол.

Кейін таныстарының көмегімен олардың әлеуметтік желідегі парақшалары табылған. Әсем әйелдердің біріне хабарласып, бөтен тойға не үшін келгенін сұраған.

Оның сөзінше, әйел:

“Шетелдік досыма қазақтың қонақжайлығын көрсеткім келді. Тамақты қызғанып тұрсыз ба?” – деп жауап берген.

Бұл жауап той иесінің ашуын одан сайын келтірген. Өйткені шақырусыз келген екі адамның орнының өзі 110 мың теңге тұрған.

“110 мың теңге менің қалтамнан шықты. Жабық банкетке кіріп алып, мұны қонақжайлық деуге бола ма?” – деп жазды Әсем.

Әсем кейін Threads қолданушыларынан полицияға жүгіну керек пе, жоқ па деп кеңес сұрады.

Оқиға әлеуметтік желіде қызу талқыланды. Кей қолданушылар енді тойға шақырылған әр адамға жеке QR-код беріп, кіреберісте тексеру керек деген пікір айтты. Тағы бірқатары банкеттегі күзет пен қонақтарды қарсы алуға жауапты адамдар мұндай жағдайға жол бермеуі керек деп санайды.

Оқиғадан кейін Threads қолданушылары да өз басынан өткен ұқсас жағдайларды бөлісе бастаған.

Бір қолданушы бұрынғы көршілерін еске алған. Оның сөзінше, ерлі-зайыпты адамдар той мен асқа жиі барып жүрген.

“Екеуі тойға, асқа, құдайы тамаққа жұмысқа барғандай баратын. Үнемі үлкен сөмке алып жүретін”, – дейді пікір иесі.

Тағы бір қолданушы Қарағандыдан Алматыға тойға келген кезде екі бейтаныс қыздың арнайы белгіленген орындарға отырып алғанын жазған.

“Оларға бұл орындардың бос емес екенін айтқанда, басқа үстелге ауысып отырды. Ертеңіне фотоларды қарап, кім екенін сұрастырдық. Оларды ешкім танымады. Тамақтанып қана қоймай, сарқыт салып, тойбастарды да алып кеткен”, – дейді ол.

Шақырусыз адамдардың тек тойға емес, қаралы асқа да келетінін айтқандар болды.

Бір әйел былтыр қайын атасының асына бөтен ер адамның келгенін жазған.

“Бірден төрге барып, имамның қасына отырды. Жұртқа сөз де сөйледі, соңында сарқыт сұрады. Аста жанжал шығарғымыз келмеген соң үндемедік”, – дейді ол.

Ал тағы бір желі қолданушысы өзінің бөтен тойға кездейсоқ кіріп кеткен сәтін еске алған. Ол кезде құрбысымен бірге небәрі 17 жаста болған.

“Сыныптасымыз сол тойда ансамбльде гитарада ойнайтын. Біз тек соны тыңдауға барғанбыз. Бірақ бізді қонақ деп ойлап, дастарқанға отырғызды. Қатты ыңғайсыздандық, тамақ та іше алмадық”, – деп жазды ол.

Желі қолданушылары мұндай жағдайлардан кейін тойға кіреберісте қонақтарды тізім бойынша тексеру немесе жеке QR-код енгізу керек деген пікір білдіріп жатыр.

Тағы бір Алматы тұрғыны тойына шақырусыз келген бейтаныс адамдарға шағымданды. Оның сөзінше, бір қыз шетелдік досын ертіп, бөтен ұзатуға кіріп кеткен.

Ол да Threads желісінде дастархан басында отырған жұптың суретін жариялап, олардың той иелерін де, қонақтарды да танымайтынын жазған. Соған қарамастан, олар дастарханға жайғасып, тамақ ішіп, би билеген. Ал сол сәтте арнайы шақырылған кей қонақтарға орын жетпей қалған.

Той иесінің айтуынша, мейрамханадағы бір орынның құны 55 мың теңге болған.

“7 ақпанда бізде ұзату болды. Бұлар келіп, ешкім шақырмаса да орындарға отырып, тамақ ішіп, би билеп жүрді. Ал бізде кіреберісте кімнің қай жерде отыратынына дейін көрсетілген еді. Сөйтіп, неге орын жетпей жатыр деп түсінбей қалдық. Алматыдағы арзан мейрамхана емес, бір адамға 55 мың теңге. Егер осыны көріп отырсаңыздар, бұл қылықтарыңыз дұрыс емес”, – деп жазды алматылық тұрғын.

Кейін жазба авторы суреттегі қызды Instagram желісінен тапқанын айтқан. Қыз кешірім сұрап, жағдайды түсіндіруге тырысқан.

“Біз сіздердің тойларыңызда небәрі 30-40 минут қана болдық. Шетелдік досыма қазақтың тойын көрсеткім келді. Басқа ешқандай жаман ойым болған жоқ. Қазақ – қонақжай халық қой, соны көрсеткім келді”, – деп жауап берген ол.

Бұл жағдай желі қолданушыларын да таңғалдырған.

“Бір нәрсені түсінбедім: бөтен тойға кіріп алып, неге суретке түскен?”, “Қойшы, ештеңе етпейді”, “Сізге не, обал ма?” деп жазып отырғандар болса, сол адамдардың орнына тым болмаса 10 мың теңгеден аударып берсін”, – деп жазды олар.

Фото: ЖИ

• Stan.kz