https://turkystan.kz/article/259746-iandeks-taksi-chevrolet-cobalt-kolikterine-tyiym-salgany-ras-pa
Яндекс Такси компаниясы Chevrolet Cobalt көліктеріне шектеу қойылады деген ақпаратты ресми түрде жоққа шығарды. Бұл туралы компанияның баспасөз қызметі мәлімдеді, деп хабарлады Turkystan.kz.
Соңғы күндері бірқатар БАҚ-та Yandex Go такси қызметінде Chevrolet Cobalt маркалы көліктерге 2025 жылдың соңына дейін тыйым салынады деген қауесет тараған болатын. Алайда бұл мәлімет шындыққа жанаспайды.
«Көлік жүргізушілеріне Cobalt үлгісіндегі көліктерін ауыстыру қажет деген ақпарат шындыққа сәйкес келмейді. Мұндай талап қойылған жоқ. Сондай-ақ осындай хабар таратқан медиалар тарапынан бізге ешқандай ресми сауал жолданбаған», — делінген хабарламада.
Яндекс Такси компаниясы өкілдерінің айтуынша, қолданыстағы талаптар өзгерген жоқ, және жаңа шектеулер енгізілмеген.
Қызметке қойылатын көлік талаптарының актуалды тізімі компанияның ресми сайтында және мобильді қосымшаларында қолжетімді.
