https://turkystan.kz/article/259742-sport-salasyndagy-zemqorlyq-zyl-basynan-beri-18-qylmystyq-is-qozgalgan
Сыбайлас жемқорлыққа қарсы қызмет өндірісінде спорт саласындағы сыбайлас жемқорлық құқық бұзушылықтарға қатысты 18 қылмыстық іс қаралған, деп хабарлайды turkystan.kz.
Аяқталған істер бойынша жалпы залал 800 млн теңгеден асқан.
Жемқорлық схемалары жалған оқу-жаттығу жиындарын өткізу, жалақы төлеу, қымбат тұратын спорттық жабдықтар сатып алу кезінде анықталған.
Биылғы 21 сәуірде сот Алматы облысының Дене шынықтыру және спорт басқармасының бұрынғы басшысы Д. Коспановқа қатысты үкім шығарды.Ол «Олимпиадалық резервті дайындау орталығы» КММ аға жаттықтырушысы Н. Майлашевтен бюджет қаражаты есебінен оқу-жаттығу жиындарына шығуға жәрдемдескені, сондай-ақ КММ жаттықтырушыларынан жалпы сомасы 2,4 млн теңгеге ақша қаражатын заңсыз жинау жолымен лауазымдық өкілеттіктерін теріс пайдаланғаны үшін 1,7 млн теңге сомасында пара алғаны үшін кінәлі деп танылды.Бұған қоса басқарма басшысы КММ-де еңбек қызметін іс жүзінде жүзеге асырмаған адамдарға жалақыны заңсыз есептеу жолымен 1,1 млн теңге сомасында бюджет қаражатын жымқырғаны үшін кінәлі деп танылды.
Қоспанов 4 жылға, Майлашев 3 жылға бас бостандығынан айырылды.
Бұған дейін Қарағанды қаласының Қазыбек би аудандық соты «Жастар» олимпиадалық резервінің облыстық мамандандырылған балалар-жасөспірімдер мектебінің футболдан басшысы Б. Нұрлановқа қатысты үкім шығарған болатын. Ол оқу-жаттығу жиындарын жалған өткізу арқылы 3 млн теңгеден астам сомаға бюджет қаражатын жымқырғаны үшін кінәлі деп танылды.
Нұрланов мемлекеттік қызметте, судьяда және жергілікті өзін-өзі басқару органдарында қызмет атқару құқығынан өмір бойына айыра отырып, 2 жылға бас бостандығынан айырылды.
Қазақстан Республикасы Туризм және спорт министрлігі Спорт және дене шынықтыру істері комитетінің «Спортты дамыту дирекциясы» РМҚК директоры мен оның орынбасарына қатысты тергеу аяқталды.
2022-2023 жылдар аралығында кәсіпкерлік субъектісімен алдын ала сөз байласу бойынша лауазымды тұлғалар спорттық жабдықтар сатып алуға бөлінген 397 млн теңге мөлшерінде бюджет қаражатын жымқырғаны анықталды.
Сонымен қатар, 2021 жылы «Dat Corporation» ЖШС директоры ретінде Батыс Қазақстан облысында футбол мен допты хоккейді дамытуға бөлінген 161 млн теңге көлемінде бюджет қаражатын жымқырған.
Алматы қаласы бойынша Сыбайлас жемқорлыққа қарсы қызмет жемқорлық қылмыс жасауда Алматы облысы Дене шынықтыру және спорт басқармасының бұрынғы басшысын әшкереледі.
Ол олимпиадалық резервтің республикалық мамандандырылған мектеп-интернатының директоры бола тұра, азық-түлік өнімдерін жеткізу бойынша көрсетілетін қызметтерді мемлекеттік сатып алу шартын жасасқаны үшін дара кәсіпкерден 8 млн теңге сомасында пара алды деп күдіктенеді.
Биылғы жылдың 24 сәуірінде күдікті соттың санкциясымен қамауға алынды.
Тергеу жалғасуда.
